Vizita e kancelares gjermane Angela Merkel ka marrë vëmendjen edhe të Komisionit të Ligjeve, ku batutat mes deputetëve kanë shoqëruar mbledhjen. Kjo pasi deputetët nuk janë lejuar që të parkojnë makinat e tyre para hyrjes së Kryesisë së Kuvendit, si pjesë e masave të sigurisë për vizitën e Merkel në Tiranë.
Siç raporton Shqiptarja.com gjatë mbledhjes së Komisionit të Ligjeve, Famir Xhafaj u ka kërkuar deputetëve që t’i largojnë makinat për arsye sigurie.
Pas këtij lajmërimi, një pjesë e mirë e deputetëve në komision janë çuar për të lëvizuar makinat.
Por i menjëhershëm ka qenë reagimi i Nard Ndokës, i cili është përpjekur ti qetësojë me origjinën e tij fetare. “Unë jam demokristian, nuk jam i rrezikshëm,” ka thënë Ndoka.
Batutat në Komision
Xhafaj: Tani këto për 24 muaj ka të drejtë relatori se 24 muaj për të nxjerr ca akte nënligjore ju? Po ca do bëni 24 muaj? 6 muaj thotë z. Majko dhe shumë i keni dhe ka të drejtë.
Manja: Do i çik afat se ka shumë biocid insekte.
Xhafaj: Para se të fillojë projektligji tjetër ku ka makinën aty poshtë të shkoj ta heqë për efekt sigurie nuk do të ketë makina.
Fino: Ça efekt sigurie, më i sigurt jam unë se Merkeli.
Xhafaj: Kush e ka makinën aty poshtë të iki ta heq…
(Ikin deputetët e PD)
Xhafaj: Vazhdojmë se edhe njoftimi për makinën e bëri efektin. Edhe ti Vexhi ke makinë aty poshtë. Hajde Vexhi hajde se ti ecën në këmbë ngadalë ngadalë me qetësi vëlla. Dashi me biçikletë, ti në këmbë, Nard Ndoka me makinë.
Ndoka: Unë me makinë s’jam problematik, jam demokristian unë.
Xhafaj: Tani ju gazetarët e morët lajmin, se ju këto pjesë keni qejf batutat se ça rëndësi kanë të tjerat. Ja mbushni gazetat, punë e madhe që do të bëhen koncesionet.
