Departamenti Amerikan i Shtetit do ta bëjë të përhershëm programin e garancisë financiare për vizat për aplikantë nga 50 vende, kryesisht nga Afrika. Aplikantëve do tu duhet të depozitojnë garanci deri në 20,000 dollarë kur kërkojnë viza amerikane, sipas një njoftimi Federal, i cili do të zbatohet për vizat B1 dhe B2, që lëshohen për biznes dhe turizëm.
“Programi pilot i garancisë së vizave i vitit 2025, i cili ofroi një kornizë për Departamentin e Shtetit, Departamentin e Sigurisë Kombëtare dhe Departamentin e Thesarit për të vlerësuar fizibilitetin e administrimit të një programi bonosh vizash, ka ofruar të dhëna të mjaftueshme për të sugjeruar që një program garancie vizash është një mjet efektiv për të zbatuar pajtueshmërinë midis mbajtësve të vizave të lidhura” , thuhet në njoftim.
Në programin pilot, zyrtarët konsullorë mund të kërkojnë garanci prej 5,000 dollarësh, 10,000 dollarësh ose deri në 15,000 dollarë. Rregulli përfundimtar eliminon opsionin prej 5,000 dollarësh dhe e rrit garancinë maksimale në 20,000 dollarë. Ky rregull hyn në fuqi më 3 gusht, kur është planifikuar të publikohet në Regjistrin Federal. Në listën e 50 vendeve, për qytetarët e të cilëve zbatohet ky program, 30 janë nga Afrika.
Zyrtarët amerikanë thonë se politika synon të zvogëlojë tejkalimet e afatit të vizave. Avokatët e imigracionit argumentojnë se kjo do të pengojë udhëtimet e ligjshme drejt Shteteve të Bashkuara.
Mbrojtësit e të drejtave të njeriut thonë se masat agresive të Presidentit Trump kundër imigracionit shkelin lirinë e fjalës dhe procesin e rregullt ligjor, ndërsa krijojnë një mjedis të pasigurt për pakicat etnike dhe inkurajojnë profilizimin racor . Trump i ka mbrojtur masat si të nevojshme për të forcuar sigurinë kombëtare.
Ndërsa Trump thotë se dëshiron të frenojë imigracionin e paligjshëm, administrata e tij e ka bërë imigracionin e ligjshëm më të vështirë, për shembull, duke vendosur tarifa të reja dhe të shtrenjta për aplikantët e vizave të caktuara dhe duke zbatuar verifikimin e mediave sociale për aplikantët dhe emigrantët që janë tashmë në vend.
