E pyetur nga “Panorama” se çfarë shije i ka lënë ky dekorim, zonja Kapo i cilëson përfaqësuesit e Ballit tradhtarë, të cilët bashkëpunuan me pushtuesin e huaj kundër interesave të vendit.
“Nuk ka gjë më të ulët. Çfarë mund të them?! E pashë dhe m’u duk një çmenduri. Si mund të dekorosh ata që u bashkuan me pushtuesin e huaj kundër partizanëve, bijve të popullit. Së bashku me pushtuesin e huaj ata luftuan kundër çlirimit të vendit sepse, nëse donin çlirimin e vendit, duhet të ishin në krah me partizanët.
Ata kanë qenë dhe mbeten tradhtarë të Shqipërisë, të cilët jo vetëm nuk duhen dekoruar, por as duhen zënë fare me gojë. Këto gjëra dihen publikisht. Mos më lëndoni më shumë zemrën me këto gjëra”, u shpreh e veja e Hysni Kapos, figurës numër dy të sistemit komunist në Shqipëri.
Historiani
Paskal Milo, historiani i njohur, ka kërkuar që dekorime të tilla duhet të marrin fund, pasi zhvlerësojnë rolin e Presidentit dhe vlerën e dekoratave. Milo e ka quajtur ngjarjen si kriminale dhe të dënueshme, por ajo, sipas tij, ka ndodhur në kushtet e luftës.
Ngjarje të tilla kanë ndodhur dhe me mijëra shqiptarë që u vranë sipas tij nga pushtuesit,
ballistët dhe zogistët. Milo është shprehur se Mehmet Shehu u kritikua nga Enver Hoxha për
vrasjen e 67 ballistëve pa gjyq, duke e quajtur ngjarjen si shumë të rëndë, por sipas historianit, Shehu vazhdoi pushkatimet e kundërshtarëve.
“Për çfarë ideali demokratik u vranë këta njerëz dhe kujt i shërbeu nga ata në atë kohë? Ata ishin viktimat e luftës si mijëra të tjerë të vrarë nga pushtuesit, ballistët, zogistët dhe nga partizanët. E dhimbshme, e trishtueshme, e dënueshme, por ky ishte realiteti i kohës.
Keqpërdorimi i vrasjes së tyre dhe spekulimi me vrasjen e tyre është i pafalshëm. Ndaj dhe duhet ndalur epidemia e dekorimeve për qëllime të politikës së ditës, sepse zhvlerëson vetë titujt e lartë dhe të nderuar, por edhe institucionin që i akordon ato”, u shpreh Milo.
Edhe Fatos Klosi, një nga polemistët e majtë, e ka quajtur si qesharak vendimin e Presidentit për të shpallur si “Martirë të Demokracisë” 67 anëtarët e Ballit Kombëtar, të pushkatuar në vitin 1943 nga Mehmet Shehu. Klosi tha se ndiente keqardhje për Presidentin.
Ai tha se një ngjarje të tillë, nuk e kanë vlerësuar presidentet e tjerë dhe askush nuk i bëri martirë. Fatos Klosi ka ironizuar me Presidentin, duke thënë se porosinë e ka marrë nga ballistët që jetojnë në Amerikë.
ma.me
