Temperatura globale është 1,2 gradë më e lartë në krahasim me nivelet para-industriale. Faji? Fenomeni “El Nino” dhe para së gjithash efekti serë
Agjencia Metereologjike e Kombeve të Bashkuara, ka bërë të ditur se viti 2016 është drejt rrugës për t’u bërë më i nxehti në historinë e planetit. Sipas “Wmo”-së, temperatura globale në 2016-ën, është 1,2 gradë më e lartë me nivelet para-industriale. Fenomeni “El Nino” ka ndihmuar për këtë rezultat, por arsyeja kryesore sipas agjencisë, mbetet efekti-serë i prodhuar nga aktivitetet njerëzore. Në të vërtetë, 2015, ka qenë viti më i nxehtë i të gjitha kohërave deri tani.
Raporti përfundimtar do të publikohet në fillim të 2017-ës. “Një tjetër vit. Një tjetër rekord, – ka komentuar Sekretari i Përgjithshëm i Organizatës Metereologjike Botërore, Petteri Tallas. – Temperaturat e larta që kemi përjetuar në 2015-ën, pritet të parakalohen në 2016-ën. Nxehtësia suplementare e “El Nino”-s, është zhdukur. I nxehti për shkak të ngrohjes globale do të vazhdojë”.
“Në disa pjesë të Rusisë dhe Arktikës, temperaturat janë nga 6 deri në 7 gradë mbi mesataren e periudhës së fundit, – ka shtuar Tallas. – Shumë rajone të tjera arktike dhe sub-arktike në Rusi, Alaskë dhe në veri-perëndim të Kanadasë, ishin të paktën 3 gradë mbi mesataren. Ishim mësuar të matnim temperaturat rekord në fraksione të gradëve, por kjo është një tjetër gjë”, raporton shqip.
Për Tallas “për shkak të ndryshimit klimaterik, frekuenca dhe impakti i ngjarjeve ekstreme, janë shtuar. Valët e të nxehtit dhe përmbytjet që dikur ndodhnin shumë rrallë, po bëhen gjithnjë e më të rregullta. Shtimi i nivelit të detit ka shtuar ekspozimin e stuhive të shpeshta dhe cikloneve tropikalë”. Parashikimi për vitin 2016, është në përmbajtjen e një raporti paraprak që “Wmo” ka shpërndarë për konferencën e OKB-së mbi klimën në Marrakech të Marokut./a.k
