Ekziston një vitaminë që zakonisht gjendet në perimet me gjethe jeshile, vajrat vegjetale dhe drithërat. Dhe është thelbësore për mpiksjen e gjakut dhe shërimin e plagëve. Por, jo vetëm kaq: sipas një studimi të ri, mosmarrja e mjaftueshme e kësaj vitamine na vë në rrezik shëndetin e mushkërive. Çfarë vitamine është ajo? Vitamina K.
Një grup shkencëtarësh danezë kanë zbuluar se individët me nivele më të ulëta të vitaminës K në gjakun e tyre mund të jenë më të prirur ndaj problemeve të tilla si astma dhe sëmundjeve kronike pulmonare.
I kryer nga një ekip mjekësh nga Spitali Universitar i Kopenhagës dhe Universiteti i Kopenhagës, studimi përfshiu më shumë se 4 000 pjesëmarrës të moshës 24 deri në 77 vjeç. Studiuesit morën një mostër gjaku për të identifikuar nivelet e ulëta të vitaminës K. Ata panë se pjesëmarrësit me nivele të reduktuara të vitaminës K kishin më shumë gjasa të raportonin episode të astmës ose problemeve me frymëmarrjen.
“Ne e dinim tashmë se vitamina K luan një rol të rëndësishëm në gjak dhe kërkimet kanë filluar të tregojnë se ajo është gjithashtu e rëndësishme për shëndetin e zemrës dhe kockave, por deri më tani ka pasur shumë pak kërkime për vitaminën K dhe mushkëritë. Sipas njohurive tona, ky është studimi i parë i vitaminës K dhe funksionit të mushkërive në një popullatë të madhe të përgjithshme. Dhe gjetjet sugjerojnë se vitamina K mund të luajë një rol në mbajtjen e mushkërive tona të shëndetshme”, shpjegon Dr. Torkil Jespersen.
Por, kjo nuk do të thotë se duhet të marrim doza të mëdha të vitaminës K, pa u konsultuar me mjekun: “Gjetjet tona nuk ndryshojnë rekomandimet aktuale për marrjen e kësaj vitamine, por sugjerojnë se kemi nevojë për më shumë kërkime nëse disa njerëz, si ata me sëmundje të mushkërive, mund të përfitojnë nga suplementet”.
Ekipi danez po kryen një studim klinik gjithëpërfshirës duke krahasuar suplementet e vitaminës K me një placebo për të hetuar ndikimet e mundshme në shëndetin e zemrës dhe kockave. Studimi tani do të integrojë gjithashtu një analizë të shëndetit të frymëmarrjes.
“Analizat e mëtejshme do të na ndihmojnë të kuptojmë më shumë rreth kësaj lidhjeje dhe të shohim nëse rritja e vitaminës K mund të përmirësojë apo jo funksionin e mushkërive”, shton Dr. Apostolos Bossios nga Instituti Karolinska në Suedi.
/a.r
