Gjatë pandemisë së Covid-19, ai mbështeste idenë se vitamina D dhe hidroksilklorokina mund të luftonin virusin më mirë se vaksinat. Më pas, ai deklaroi se emri “Covid” në fakt fshihte “origjinën e vërtetë të virusit, duke e bërë më të vështirë studimin dhe hartimin e një përgjigjeje”.
Megjithatë, ai nuk ka asnjë përgatitje në mjekësi, edhe pse që nga dje është drejtori i ri i Shëndetësisë së Shteteve të Bashkuara të Amerikës. Jim O’Neill, besnik i Sekretarit të Shëndetësisë dhe Shërbimeve Njerëzore Robert Kennedy Jr., emëruar përkohësisht në vend të Susan Monarez, në krye të CDC-së (Qendrat për Kontrollin dhe Parandalimin e Sëmundjeve).
Ai do të drejtojë agjencinë derisa të emërohet një drejtor i ri dhe ndërkohë do të ndihmojë qeverinë amerikane në rishikimin e politikës federale për vaksinat. Lajmi për emërimin është bërë i ditur në një mesazh të Kennedy-t drejtuar stafit të CDC-së, të siguruar nga CBS, ku ai shprehet se synon “ta rindërtojë këtë institucion duke e kthyer në atë që gjithmonë duhet të kishte qenë: kujdestar i shëndetit dhe sigurisë së Amerikës”.
Susan Monarez, shkencëtare me shumë vite përvojë në shëndetin publik, ishte emëruar pasi Trump kishte tërhequr zgjedhjen e tij të parë, ish-deputetin republikan Dave Weldon, një kundërshtar i vaksinave i përafruar me qëndrimet e Kennedy-t. Sipas ish-drejtorit të CDC-së, Richard Besser, Monarez u shkarkua sepse refuzoi të largonte drejtuesit kryesorë të agjencisë dhe të firmoste ndryshimet në politikat e vaksinimit të hartuara nga grupi i këshilltarëve të zgjedhur personalisht nga Kennedy Jr. Kjo tezë është konfirmuar pothuajse edhe nga Shtëpia e Bardhë.
“Ajo nuk ishte e përafruar me misionin e presidentit Trump për ta bërë Amerikën sërish të shëndetshme”, tha zëdhënësja Karolinea Leavitt, duke theksuar të drejtën e presidentit për ta shkarkuar. “Sekretari i kërkoi të jepte dorëheqjen, ajo refuzoi dhe Trump e shkarkoi. Ai ka të drejtë ta bëjë këtë”, shtoi ajo.
Avokatët e Monarez nuk janë dakord, duke akuzuar sekretarin e shëndetësisë se “ka përdorur shëndetin publik si armë për qëllime politike” dhe se “ka vënë në rrezik miliona jetë amerikane” duke spastruar funksionarë të shëndetit. Shkarkimi i Monarez është vetëm i fundit në një sërë spastrimesh të ndërmarra nga administrata Trump muajt e fundit.
Ndërsa Monarez ka një formim shkencor të konsoliduar, pasardhësi i saj e ka kaluar karrierën në investime në Silicon Valley. Kontakti i tij i vetëm me botën e shëndetësisë ka qenë në vitin 2001, gjatë administratës Bush, kur u emërua shkrues fjalimesh në Departamentin e Shëndetësisë. Më pas, Kennedy Jr. e emëroi zëvendëssekretar të Shëndetësisë, post që mbante deri dje.
Tani, ai pritet të forcojë linjën e Kennedy Jr. mbi vaksinat. Sekretari i shëndetësisë ka shkurtuar tashmë me gjysmë miliardi dollarë fondet për vaksinat me mRNA dhe ka kufizuar përdorimin e atyre kundër Covid-19 vetëm për personat me probleme të mëparshme shëndetësore. Në të kaluarën, O’Neill ka tentuar të qetësojë skeptikët duke u vetëquajtur “pro-vaksinave”, por mes demokratëve dhe profesionistëve të shëndetit është përhapur një tjetër bindje. “A kanë mbetur SHBA-të pa profesionistë shëndetësorë me përvojë të provuar?”, pyeti për The Guardian kirurgu dhe eksperti i shëndetit publik Atul Gawande.
Deri tani nuk ka komente nga Shtëpia e Bardhë për zgjedhjen e O’Neill. Ndërkohë, Leavitt u tha dje gazetarëve se “nëse ka persona që nuk janë të përafruar me vizionin e presidentit dhe sekretarit për ta kthyer vendin tonë në shëndet të plotë, ne jemi të lumtur t’i përcjellim deri te dera”.
Po dje, në Fox & Friends në Fox News, Kennedy Jr. foli për një “lidership të fortë që të jetë në gjendje të realizojë ambiciet e mëdha të presidentit Trump”. Ndërkohë, raportohet se të paktën katër zyrtarë të lartë të CDC-së kanë dhënë dorëheqjen, mes tyre Debra Houry, Shefe e Shkencës dhe Mjekësisë në CDC, dhe Demetre Daskalakis, që drejtonte Qendrën Kombëtare për Imunizim dhe Sëmundje Respiratore.
