Mjeku i njohur Erion Dasho ishte i ftuar në Ditarin e mesditës me Denisa Pashollin ku foli rreth situatës së krijuar në Kinë nga një virus, prej nga ku vijnë pamje me spitale të mbushura me pacientë që kanë nevojë për ndihmë.
Për mjekun Dasho, bëhet fjalë për një virus të njohur që ka qarkulluar prej më shumë se 20 vitesh, të cilit i njihet rruga e transmetimit, shkalla e komplikacioneve, por edhe mënyra e parandalimit.
Sipas tij, ajo që e bën këtë situatë shqetësuese, është edhe njëherë mungesa e transparencës nga autoritetet kineze, njësoj si me Covid-19.
“Nuk është i ri. Ky virus është identifikuar për herë të parë në 2000 dhe besohet se qarkullon prej shumë vitesh. Është një virus i stinës. Është një grup virozash përgjegjëse për infektimeve në vjeshtë dhe dimër.
Ky virus shkakton infeksione te foshnjat, por edhe te të moshuarit dhe ata me imunitet të dobët. Është një virus i njohur, i njihen rrugët e transmetimit, shkalla e komplikacioneve dhe mënyrat e parandalimit.
Na shqetëson fakti që vjen nga Kina. Pasi në ndryshim nga vendet e Evropës ku ka transparencë, autoritetet kineze nuk janë transparentë. Edhe pak ditë më parë OBSH i kërkoi Kinës të ndajë të dhënat për Covid. Fakti që në Kinë një situatë është jashtë të zakonshmes është shqetësuese. Para 5 vitesh kishim patogjen të ri, më shkallë të lartë transmetimi dhe që e bënte Covid më të rrezikshëm”, tha Dasho.
