Një konkurs kombëtar për instrumentistë do t’ia hapte dyert jashtë vendit.
Pas një serie koncertesh në Austri, Francë e Itali, violinisti Smerald Spahija krijoi mundësinë që të shkonte në Spanjë.
Duke lënë prapa Shqipërinë e paskomunizmit, në vitin 1992 do të nisej në kërkim të një ngritjeje më të madhe artistike.
Atje do të gjente një kulturë krejt tjetër nga ajo në Shqipëri, shkruan “Koha Ditore”. Për dy dekada tashmë ka zënë vendin e koncertmjeshtrit në Orkestrën Simfonike të Baleas, një prej orkestrave më të njohura në Spanjë.
Në muzikën klasike është dashuruar si i vogël, e violinën nuk është se e ka zgjedhur me qëllim, por prapë kjo është jeta e tij.
E për këtë nuk është pishman. Në vitin 2014, duke dashur që ta sfidonte veten edhe më shumë ai krijoi “Chamber Film Orchestra” përmes së cilës lidh muzikën dhe filmin në një vend.
Ka interpretuar në vende të ndryshme të botës, qoftë me orkestër apo edhe si soloartist, ndërsa të hënën erdhi për herë të parë në Kosovë. Prishtina për të gjithmonë ka qenë si një iluzion.
Për ardhjen e tij në Kosovë u bë sebep edicioni i 17-të i “Kosovo KamerFest”. Në një intervistë për gazetën ai ka rrëfyer për rrugëtimin e tij jetësor dhe ardhjen në Kosovë… (b.an)
