Situata e krijuar nga moti i keq në Qarkun Gjirokastër vijon të paraqesë problematika në disa bashki, kryesisht për shkak të rrëshqitjeve të dherave, rënies së inerteve dhe bllokimit të akseve rrugore, ndërsa strukturat vendore dhe ato të emergjencave civile ndodhen në terren dhe në gatishmëri të plotë.
Në Bashkinë Gjirokastër rruga e Qafës së Çajupit vijon të jetë e bllokuar, ndërsa kontraktorët po punojnë për hapjen e saj. E bllokuar mbetet edhe rruga e Dhoksatit, ku po vijojnë punimet për pastrim dhe rikthim të qarkullimit.
Në qytetin e Gjirokastrës vazhdon puna për heqjen e inerteve nga akset urbane. Në zonën e Lunxhërisë, mbi fshatin Mingul, ka një rrëshqitje masive të një kodre, e cila paraqet rrezik dhe po monitorohet nga strukturat përgjegjëse.
Edhe në Bashkinë Libohovë në Njësinë Administrative Zagori, rrugët hyrëse të fshatrave Zhej, Lliar dhe Topovë vijojnë të jenë të bllokuara për shkak të rrëshqitjeve të dherave, të cilat vazhdojnë ende.
Në Bashkinë Memaliaj fshati Kurtjez vijon të jetë pa energji elektrike për shkak të rënies së pemëve mbi linjat e tensionit. Punonjësit e OSHEE-së po punojnë për riparimin e defekteve.
Në Njësinë Administrative Memaliaj (fshat), një rrugë e brendshme mbetet e bllokuar, duke izoluar 5 banesa.
Në fshatin Tosk-Martalloz, në fund të lagjes Kërvaçkaj, ka rrëshqitje dherash që rrezikon një banesë. Për shkak të terrenit të vështirë, ndërhyrja me mjete është e pamundur.
Gjithashtu, në aksin Agjencia e Luftinjës – Izvor ka pasur rënie pemësh dhe po punohet për pastrimin.
Në fshatin Levan, janë shënuar përsëritje të rrëshqitjeve të dherave edhe pas ndërhyrjeve të mëparshme.
Në Bashkinë Këlcyrë është bllokuar rruga në fshatin Luar, Njësia Administrative Sukë.
Në Bashkinë Tepelenë vijon të pastrohet aksi Tepelenë – Gjirokastër, pranë zonës së Shkallës së Zezë, ndërsa qarkullimi kryhet me një korsi.
Niveli i lumit Vjosë i matur në pikën në Memaliaj është 4.7 metra, ndërsa në Përmet 4.4 metra. Nivelet e lumit janë nën monitorim të vazhdueshëm nga strukturat përkatëse.
