“Regjizori dhe drejtuesi i teatrit Federik Mirdita vdiq në spitalin e Vjenës për shkak të plagosjeve të rënda të marra në një aksident automobilistik disa javë pas 85-vjetorit të lindjes së tij. Kjo u bë me dije nga bashkëshortja Brigitte Hofer.
Mirdita u lind më 26 janar 1931 në Tiranë, u rrit në Grac dhe studio në Vjenë për teatër, psikologji dhe histori arti. Përvojat e para në fushën e teatrit i mblodhi në vitet ’50 në skenat e bodrumeve vjeneze. Në 1955 ai u punësua si drejtues i shfaqjeve të mbrëmjes dhe asistent i Herbert von Karajan në Operën Shtetërore të Vjenës. Në vijim Mirdita punoi si regjizor i lirë opere dhe teatri në gjithë zonën gjermanishtfolëse. Në 1964-1967 ishte drejtues i shfaqjeve në Braunshvajg dhe më vonë drejtor i operas në Linc.
Shkrirja e strukturave të ngrira
Pas një zgjerimi ndërkombëtar të karrierës së tij regjizoriale (me vënie në skenë mes të tjerash në Amsterdam, Buenos Aires, Nju Jork ose San Francisko) ai mori detyrën e drejtorit të Teatrit të Landit të Salcburgut dhe e mbajti atë deri në vitin 1986. Projekte inovative, që synonin të shpluhurosnin teatrin dhe t’i flisnin shtresave të reja të publikut, e ajrosën skenën në qytetin e Moxartit, por gjithashtu shkaktuan edhe sulme të ashpra. “Për mua ishte një eksperiment”, e përmblodhi Mirdita njëherë përvojën e tij me “shkrirjen” e strukturave të ngurta dhe të ngrira, “unë doja të dija, nëse është e mundur që në një teatër aq të vogël të mund të bëhet teatër që nuk është provincial. Dhe kam parë që është e mundur. Çasti më i bukur ishte kur në drejtimin e punës për shkrirjen, të shihja se si akulli thyhej. Çasti më i keq ishte, kur ktheja kokën pas dhe shihja se si akulli bëhej përsëri bashkë.
Më pas Mirdita punoi si regjizor i lirë. Si regjizori i parë austriak ai vuri një shfaqje në skenë në teatrin Bolshoi të Moskës. Tre të katërtat e mbi 180 punëve të tij regjizoriale i përkisnin operës. Më së shumti, “kokëshkëmbi shumë i talentuar” (cit.Der Spiegel) vuri në skenë “La Clemenza di Tito” të Moxartit (mes të tjerash në Vjenë, Salcburg, Paris, Napoli dhe Nju Jork). Përtej kësaj Mirdita punoi edhe si pedagog regjie në Seminarin Max Reinhardt në Vjenë.”
