Duel në distancë edhe kur makinat nuk zbresin në pistë. Mercedes dhe Ferrari ndezin motorët për një tjetër sezon spektakolar. Kampionët gjermanë dhe italianët nga Maranello u shfaqën në publik në të njëjtën ditë me makinat e reja edhe pse ndoqën rrugë të ndryshme. Ishte Mercedes që kërkoi të tërhiqte vëmendjen nga dita e madhe e prezantimit të Ferrarit, duke publikuar në Twitter disa sekrete të makinës së sezonit 2016. Në fakt ishte Nico Rosberg ai që komentoi punën e bërë nga mekanikët e skuadrës së tij, duke premtuar surpriza të shumta në ditën e prezantimit të shtunën. Disa minuta më pas Mercedes shfaqi vetëm pjesën e hundës së makinës, duke zbukuar vetëm një pjesë të vogël të misterit që po rrethon makinën kampione.
Në krahun tjetër, Ferrari zgjodhi mënyrën tradicionale të prezantimit virtual nga Maranello. Njëvendëshja e re, që do të drejtohet nga dyshja Vettel-Raikkonen, synon të rikthehet në majat më të larta të Formula 1 për të thyer hegjemoninë e Mercedes. Puna për ndërtimin e saj ka nisur që gjatë sezonit të kaluar dhe sipas dejtuesve më të lartë të skuadrës italiane, Ferrari SF16-H, është një model revolucionar. Me një imazh të ri ku janë shtuar shiritat e bardhë që në kombinim me të kuqen kombinohen te njëvendëshja e re, e cila ruan disa surpriza nën telajo ku inxhinierët kanë punuar shumë për të rritur fuqinë motorike dhe njësinë e forcës.
Vettel dhe Raikkonen u shfaqën shumë entuziastë për makinën e re që është ndërtuar e gjitha sipas projektit të drejtorit, Maurizio Arrivabene. Dukshëm i emocionuar, drejtuesi i skuadrës theksoi se inxhinierët kanë bërë një punë të madhe, ndërsa Vettel shtoi: “Mezi po pres të zbres në pistë. Këtë sezon dua të ngjitem më lart sepse jemi përmirësuar në shumë sektorë dhe kemi hedhur pas krahëve periudhën e vështirë”. Në të njëjtën linjë qëndroi edhe Raikkonen, i cili theksoi se kjo makinë ndryshon shumë nga ajo e sezonit 2015. Prezantimi u bë në ditën e 118 vjetorit të lindjes së themeluesit të kompanisë, Enzo Ferrari, por për debutimin zyrtar në pistë duhet të presim të hënën pasi Ferrari do të zbresë në pistën e Barcelonës për testet e para të sezonit. Gjatë ditës së premte zbriti në pistë edhe makina e re Williams FW38. Njëvendëshja britanike që do të drejtohet nga dyshja Massa-Bottas u prezantua në qëndrën e skuadrës në Grove të Britanisë së Madhe. Motori Mercedes do të vazhdojë të punojë nën kofanon e Williams dhe drejtori Frank Williams nuk fshehu objektivin e këtij sezoni, duke shënjestruar vendin e tretë në klasifikimin për konstruktorë. Ai shtoi se Williams duhet të jetë në gjendje të sulmojë dy rivalët më të mëdhenj, Ferrari dhe Mercedes.
