Policia e Tiranës ka arrestuar në kushtet e flagrancës shtetasin V.GJ, i cili akuzohet për dëmtim të pronës publike nëpërmjet vjedhje së kabujve të ndriçimit publik në qytetin e Tiranës. Ka qenë Bashkia e Tiranës ajo që ka bërë denoncimin në organet e rendit, për vjedhjen e ndodhur disa ditë më parë në rrugën e “Dibrës”. Vjedhja është konstatuar nga punonjësit e ndriçimit të qytetit, pasi e gjithë zona kishte mbetur pa ndriçim.
Menjëherë pas këtij momenti drejtoria përkatëse e Bashkisë së Tiranës ka kërkuar ndërhyrjen e Policisë së Shtetit për të bërë identifikimin dhe kapjen e autorit të këtij akti. Shtetasi V.GJ ka dëmtuar pronën duke vjedhur 105 metra linear kabull me një vlerë prej 169 mijë lekë të reja. Në fakt ky është një nga rastet e shumta të vjedhjes së kabujve të ndriçimit publik në qytet.
Siç mësohet vjedhja në veçanti e kabllove elektrik është një veprim që ndodh thuajse çdo natë në qytet, duke shkaktuar jo vetëm ndërprerje të energjisë dhe rrezik të jetës së qytetarëve, por edhe një dëm të madh financiar. Përllogaritet që çdo muaj, bashkisë së kryeqytetit vetëm nga ky fenomen i shkaktohet një dëm me një vlerë prej rreth 1 milionë lekësh të reja.
