Në qarkun e Shkodrës po vijojnë kontrollet për t’i dhënë fund abuzimit me energjinë elektrike.
Sipas Operatorit të Shpërndarjes së Energjisë Elektrike (OSHEE), për muajin tetor janë proceduar në polici 27 abonentë për shkelje të nenit 137 të Kodit Penal. Neni 137 i Kodit Penal është dispozita përcaktuese e veprës penale, ajo e vjedhje së energjisë elektrike ose impulseve telefonike.
Vjedhja e energjisë elektrike ose e impulseve telefonike, dëmtimi i matësit, si dhe çdo ndërhyrje tjetër e paligjshme dhe e paautorizuar në sistemin e matjes apo në rrjetin elektrik telefonik e kryer me qëllim përfitimi të paligjshëm, përbën vepër penale dhe dënohet me burgim deri në tre vjet.
Kur kjo vepër kryhet në bashkëpunim, më shume se një herë, ose nga përdoruesi jofamiljar i energjisë elektrike ose të rrjetit të shërbimit telefonik, dënohet me burgim nga një deri në pesë vjet.
Për të evidentuar shkelësit si dhe për t’i dhënë fund humbjeve në rrjetin e energjisë elektrike, OSHEE është duke ndërmarrë një sërë kontrollesh në të gjithë vendin.
