Zëvendëstrajneri i Partizanit, Klevis Dalipi, ishte ai që u shfaq para gazetarëve në përfundim të ndeshjes ndaj Laçit, në vend të trajnerit Sulejman Starova. Ai theksoi se ekipi do të vazhdonte të luftonte, ndërsa e komentoi si tolerim faktin që drejtuesit e klubit nuk kishin ndërmarrë hapa ligjorë ndaj rivalëve për videoskandalin e shpërthyer së fundmi.
Një ndeshje që sfumoi ëndrrën e titullit apo jo?
Tani, u zbehën pak shanset, por ne do vazhdojmë luftën deri në fund, të marrim edhe këto tre ndeshje 9 pikë dhe të shpresojmë që të gabojnë skuadrat që janë sipër nesh.
Si mund të pretendohen 9 pikë kur nuk u morën 3 me Laçin që lufton për mbijetesë?
Ky është futbolli, prandaj është i bukur sepse kush vjen për një pikë e ka më të lehtë se ne që duam ta marrim fitoren me patjetër. Pastaj edhe ne patëm shanset tona, sot ishim edhe të pafat, sidomos në sekondat e fundit, një shtyllë e brendshme që mund të ndryshonte fatin tonë.
Si ka mundësi që përsëritet historia në ndeshjet e fundit me Partizanin?
Më duket si histori e përsëritur, edhe vjet me Bylisin e njëjta histori. Por besoj se deri tani ne kemi ruajtur entuziazmin, jemi bashkuar, jemi grup, vazhdojmë stërvitjen. Të besojmë deri në fund, në këtë aspekt, harmonia vazhdon në skuadër.
A ndikon te Partizani edhe mendimi që rivalët luajnë jashtë fushe?
Nuk të jap dot përgjigje për këtë. Dua të them që gjithçka varej nga ne, ne i patëm mundësitë tona, sidomos në pjesën e parë.
A ka ndikuar për keq ajo videoja që ka dalë sot?
Presidenti i ynë është treguar pak zemërgjerë në këtë situatë. Ndaj ne jemi skuadër e madhe se dimë edhe të tolerojmë, vazhdojmë të luajmë me këmbët tona deri në fund.
Ju vazhdoni të thoni se luani ndershëm…
Po patjetër, ju e shihni vetë, nëse nuk e shihni edhe këtë si futboll të ndershëm, çfarë do të jetë i tillë.
Ndërsa të tjerët shfaqen me video…
Patjetër, po këto janë gjëra që nuk më përkasin, unë përqendrohem vetëm te fusha.
Në fushë, lojtarët nuk e zgjidhën situatën…
Episodet bëjnë diferencën se në momente të caktuara lojtarë si Ekuban e Sukaj, mund ta kishin zgjidhur, edhe rasti i Bathës. Por e përsëris dhe e theksoj se ky është futbolli.
c.a
