Drejtoresha e Shtëpisë së Fëmijës në Shkodër, Anjezë Gjeluci është shkarkuar nga detyra. Ky vendim vjen dy ditë pas publikimit të video-skandalit me fëmijët e këtij institucioni, ku tre kujdestare ushtronin dhunë fizike dhe psikologjike ndaj fëmijëve.
Ministri i Mirëqenies Sociale dhe Rinisë, Blendi Klosi, deklaroi nga ambientet e Shtëpisë së Fëmijës në Shkodër, se do të nisë testimi për të gjitha punonjëset e këtyre institucioneve, në të gjithë vendin.
Gjeluci është ndier shokuar nga sjellja e punonjësve të saj me fëmijët në pamjet e transmetuara në video, ndërsa është shprehur se veprimet janë të veçuara dhe personale, edhe pse ky nuk ishte rasti i parë.
“Çdokush mban përgjegjësi për veprimet që bën. Vendi është vakant, do të luftojmë rastet e dhunës. Edukatoret e jetimoreve në vend do t’u nënshtrohen testeve.” – deklaroi ministri Klosi.
Ditën e djeshme, policia shoqëroi tre kujdestaret, ndërsa ministri i Mirëqenies urdhëroi shkarimin e tyre. Shtëpia e fëmijës në Shkodër është institucion shtetëror për vogëlushët jetim nga 3 deri në 6 vjeç.
