Stuhia më e fuqishme ka goditur ishujt Karaibe të Bahamas dhe ka shkatërruar ndërtesat e ka shkaktuar përmbytje të mëdha, por fatkeqësisht i ka marrë jetën edhe një fëmijë vetëm 7 vjeç.
Uragani Dorian, goditi të djelën ishujt Bahamas tashmë si stuhi e kategorisë së rrezikshme 5 , duke lënë pas dëme katrastrofike. Uragani me erëra që mbërritën shpejtësinë 285km/h, i dyti më i fuqishëm në Atlantik i regjistruar ndonjëherë, po lëviz ngadalë drejt perëndimit, duke ngjallur frikë në Florida, Xhorxha e Karolinën e Veriut dhe atë të jugut. Me afrimin e tij, këto shtete amerikane kanë shpallur që të gjitha gjendjen e jashtëzakonshme, ndërsa banorët kanë nisur përgatitjet për mbërritjen e stuhisë përbindësh.
“Po i mbyllim të gjitha, kemi futur brenda gjithë orenditë që kishim jashtë, dyert e i forcuam me thasë rëre, tani, s`na mbetet veçse të shpresojmë që do t`ia hedhim paq”, tha Ryan Brady, menaxher restoranti.
“Dorian” shkuli çati ndërtesash e shkaktoi përmbytje të mëdha gjatë kalimit në Bahamas, ku për shkak të tij ka ndërprerje masive të energjisë elektrike dhe qasje të kufizuar në internet. Pjesë të tëra të ishujve Abaco thuhet të jenë nën ujë pas baticës 7 metërshe të shkaktuar nga stuhia e dhunshme.
Qendra Kombëtare e Uraganëve në Majemi tha se Dorian është një kërcënim për jetën, megjithate pasi te kete kaluar ishujt Bahamas, uragani mund të devijojë drejt veriperëndimit e te mos e godasë Floridën drejtpërsëdrejti.
Megjithëse uragani Dorian duket se se do t’ia kursejë Shteteve të Bashkuara një goditje të drejtpërdrejtë, zyrtarët thonë se një stuhi e kësaj kategorie mund të sjellë mjaft dëme si në Florida, ashtu dhe në Karolinën e Jugut e të Veriut.
