VIDEO/ I vunë gjobë 25 mijë euro biznesmenit emigrant, dalin në dritë detaje të reja, prangosja

“Na jep 25 mijë euro, ose do të vrasim djalin”.

Ky ka qenë mesazhi që ka marrë më 4 shkurt biznesmeni me inicialet V.P., në Lezhë. Por kërcënuesit, shtetasit Ded Gjoka nga Mirdita dhe Ded Çuku nga Shkodra, kanë rënë në pranga në momentin që do të merrnin paratë. Sipas të dhënave, Policia është vënë në lëvizje menjëherë pasi ka marrë sinjalin nga personi që ishte kërcënuar.

Përveç shumës së kërkuar, gjobëvënësit e këshillonin atë që të mos njoftonte policinë, pasi do të kishte pasoja të rënda për të. Ndodhur në këto kushte, biznesmeni nga fshati Torovicë i Lezhës, i cili për një kohë të gjatë ka qenë emigrant, vendosi që të bëjë kallëzim në Polici. Këta të fundit u vënë menjëherë në lëvizje dhe në harkun kohor të 5 orëve, munden që të identifikojnë dhe arrestojnë autorët e ngjarjes.

Policia i kërkoi shtetasit me iniciale V.P. që të bashkëpunonte dhe t’i informonte gjobëvënësit e tij se do t’ua sillte lekët. Ai la takim me ta në fshatin Malecaj të Lezhës. Por të gjitha lëvizjet e tij kanë qenë në survejim të Policisë. Biznesmeni ua la qesen e lekëve pranë një ure, pikërisht atje ku i kishin thënë shtetasit Ded Gjoka dhe Lek Çuku. Këta të fundit po e vëzhgonin atë me dylbi dhe janë nisur të marrin paratë, pasi kanë parë shtetasin V.P. që t’i linte në vendin e përcaktuar. Por, në të njëjtën kohë në zonë kishte mbërritur edhe policia, e cila po mbante në vëzhgim lëvizjet e autorëve. Ata morën qesen e lekëve dhe pasi i hapën dhe u siguruan për to (paratë ia kishte dhënë policia biznesmenit), u nisën për t’u larguar me një mjet.

Por rreth 200 metra më tej, ata janë ndaluar nga policia që u kishte zënë pritë dhe u arrestuan në kushtet e flagrancës. Në makinë u gjet dhe qesja e lekëve që kishin kërkuar, si dhe një palë dylbi. Në cilësinë e provës materiale policia u sekuestroi sasinë e parave, dylbitë, telefonat celularë dhe automjetin me të cilin po udhëtonin. Operacioni përfundoi në një kohë të shpejtë, ndërkohë që policia ka bërë të ditur se njëri prej autorëve ka qenë i dënuar dhe më parë për tentativë vrasjeje.

Nga të hetimet e policisë, bëhet e ditur se biznesmeni, të cilit i kanë kërkuar paratë, kishte pasur konflikte prej kohësh për çështje pronësie me disa persona të tretë. Dyshohet se kanë qenë këta të fundit që kishin kërkuar ndërhyrjen e dy personave që u arrestuan, për të marrë sasinë e parave që pretendoheshin prej tyre se ai ua kishte borxh. Në lidhje me ngjarjen, Policia së bashku me Prokurorinë e Krimeve të Rënda po vijojnë hetimet për të sqaruar rrethanat e plota, ndërkohë që biznesmeni është marrë në mbrojtje nga policia. /ma.me

 ma.me