Kryeministri i Serbisë, Aleksandar Vuçiç para pak çastesh ka arritur në Srebrenicë. Ai nuk është pritur aq mirë nga turma që janë prezent në vendin ku 20 vite më parë u bë krimi makabër.
Vuçiç u prit me britma dhe fishkëllima, por që situata nuk ishte aq dramatike për shkak të nivelit të lartë të masave të sigurisë. Ardhja e kryeministrit të Qeverisë serbe u parapriu kordoni i madh i policisë.
Ajo që ka mirëpritur Vuçiçin ishte një grua e quajtur Hatixhe Mehmedoviç. Nga ana tjetër, ardhja e delegacionit të Shteteve të Bashkuara të Amerikës, respektivisht ish-presidentit, Bill Clinton dhe Madeleine Albright është pritur me duartrokitje.
Rreth orës 12:50 në Potocari ku po mbahet 20 vjetori i masakrës së Srebrenicës, është sulmuar kryeministri serb Aleksander Vuçic.
Vuçiç ishte duke lëshuar lule në një pllakë përkujtimore kur u sulmua me gurë nga masa që ishte prezentë. Nga pamjet duket se kryeministri serb është qëlluar në kokë dhe i janë thyer edhe syzet.
Ndërhyrja ka qenë e shpejtë duke e mbrojtur atë dhe duke e shoqëruar.
Kryeminsitri serb u dërgua në makinë , por sulmi nuk mund të shmangej për shkak të kontaktit të ngushtë në mesin e njerëzve të cilët rrethuar rrugës.
Nuk raportohet për të lënduar shkruan Telegrafi serb. Prania e kryeministrit serb në këtë ceremoni nuk ishte pritur mirë që nga momenti kur ai mbërriti në Serbrenicë. Vuçiç u prit edhe me fishkëllima në momentin kur u afrua në vendin ku po bëhej nderimi i viktimave të gjenocidit në Bosnje.
20 vjet më parë, mes 11 dhe 18 korrikut, gjatë luftës në Bosnje e Hercegovinë, u krye masakra e Srebrenicës.
Tragjedia që u mori jetën 8300 personave, ishte një ndër pjesët më të errëta të historisë së kohëve të fundit në Evropë.
Në ato ditë, trupat serbo-boshnjake të udhëhequra nga gjenerali Ratko Mlladiq, hynë në Srebrenicë dhe masakruan popullsinë myslimane. 8300 të vdekur është bilanci zyrtar, por banorë të Srebrenicës, të mbijetuar nga masakra, deklarojnë se viktimat mund të jenë më shumë se 10 mijë.
Srebrenica konsiderohet si masakra më e madhe pas Luftës së Dytë Botërore. Kjo masakër është trajtuar si gjenocid nga Tribunali i Hagës dhe Gjykata Ndërkombëtare e Drejtësisë.
