Policia italiane ka nisur kërkimet për të ashtuquajturën “biondja” e cila mendohet se zbrazi armën drejt një shqiptari të shtunën e kaluar në San Donato di San Miniato në Itali. Policia është duke gjurmuar për të kudo, sidomos në provincat e Firences, Pizës dhe Pistoia.
Një nga hipotezat e vrasjes së 34 vjeçarit është se shqiptari ka ngacmuar gruan e një prej anëtarëve të bandës dhe, ky i fundit ka vendosur të ndëshkojë 34-vjeçarin. Shqiptari është ndaluar nga anëtarët e bandës në rrugën “Puccini”, teksa ishte duke lëvizur me makinën e tij tip “Lancia Y”.
Fillimisht, agresorët kanë goditur me shkopinj makinën e tij e më pas kanë dhunuar edhe shqiptarin. Ky i fundit, arrin që në një moment ti shpëtojë furisë së dhunës dhe të largohet. Pikërisht në këtë moment, biondja 40-vjeçare shkrepi pistoletën duke qëlluar me dy plumba. Mësohet gjithashtu se agresorët të cilët dhunuan para se biondja të qëllonte i përkisnin komunitetit rom.
