Dhuna rikthehet në futbollin e Maqedonisë së Veriut. Skenat kanë qenë të frikshme në fillim, por fatmirësisht ka ndërhyrë policia duke vendosur situatën në kontroll.
Sikurse njofton “Klan Macedonia”, ndeshja Shkupi-Shkëndija e Tetovës është ndërprerë dhe nuk do të vazhdojë në stadiumin e Çairit.
Ky vendim i delegatëve të ndeshjes vjen pas futjes së tifozëve vendas në fushë dhe sulmit ndaj futbollistëve mysafirë në momentin e shënimit të golit nga ana e tetovarëve, në këtë rast Shkëndijës.
Kujtojmë se ndeshja mes Shkupit dhe Shkëndijës ishte e vlefshme për çerekfinalen e Kupës së Maqedonisë, e cila u ndërpre në minutën e nëntë, ndërsa për të qetësuar situatën që po merrte “zjarr” ndërhynë forcat speciale të policisë.
Tashmë pritet vendimi i Federatës Maqedonase të Futbollit se çfarë do të bëhet me ndeshjen në fjalë, do të luhet pjesa e mbetur e saj apo do ta humbasë skuadra vendëse në tavolinë, për mospërmbushje të masave organizative.
/s.f
