Pamjet që shihni duket sikur janë filmuar në një pikë lavazhi makinash, por në fakt janë filmuar në oborrin e burgut të Fierit. Ata që duken si punonjës të lavazhit, në fakt janë të dënuar të burgut, ndërsa makinat që lahen, janë të drejtorit Arjan Hasani dhe zyrtarëve të tjerë të këtij burgu.
Kjo video është filmuar një nga ditët e fundit, por burime nga burgu i Fierit bëjnë me dije se një situatë e tillë është e zakonshme. Të dënuarit bëjnë pastruesin e makinave të drejtuesve të burgut, ndërkohë që policët e tij mbajnë nën vëzhgim procesin.
Një situatë e tillë është jo vetëm shkelje e të drejtave të njeriut, pasi të dënuarit detyrohen të lajnë makinat private, por edhe shkelje e hapur e sigurisë së tyre, pasi të dënuarit dalin në parkingun e burgut ku janë të ekspozuar.
REAGON MANJANI: PEZULLON DREJTORIN E BURGUT HASANI
Burime nga Ministria e Drejtësisë pohuan se Ministri Manjani u njoh me rastin, ndërsa ndodhet në vizitë zyrtare në Francë dhe se ka urdhëron pezullimin e Drejtorit të Burgut Fier.
“Burgu nuk është një institucion privat. Cdo i burgosur duhet trajtuar me dinjitet si çdo person tjetër”, thekson Manjani.
“Vijimi i procedurave administrative ndaj këtij rasti pas kthimit të Ministrit Manjani”, deklarojnë burime nga MD.
