Asnjë themelues, asnjë bashkëkohës dhe as studentë dhjetori nuk u shfaqën në podiumin e Sali Berishës këtë 8 dhjetor. Përballë disa të rinjve militantë të PD-së, në krah ndonjë personazh pa protagonizëm që ka qëlluar të ketë qënë një ndër 6 mijë studentët e dhjetorit ’90, Sali Berisha shfaqet ende si lider i PD-së pas 34 vitesh prej themelimit.
Por, cila është rruga e bashkëkohësve të tij, protagonistëve ’90?
Përmes një hulumtimi të shpejtë konstaton se Berisha ka mbetur vetëm.
Rënia e diktaturës komuniste në dhjetor ’90, u pasua me krijimin e një elite politike, shumica e të cilëve vinin nga PPSH, partia shtet që mbajti vendin në 50 vite diktaturë.
Gjithsesi pritej që me demokratizimin e vendit, të krijohej një model i ri i qarkullimit të elitave. Pritej që kjo të ndodhte së pari në PD. Por, historia dëshmoi krejt të kundërtën.
PPSH, që do të merrte emrin Partia Socilaiste e Shqipërisë, e krijoi traditën e qarkullimit të elitave përmes një procesi të debatit të brendshëm në parti.
Janë larguar nga Partia Demokratike të gjithë themeluesit. Disa kanë ndërruar jetë si Gramoz Pashko, Azem Hajdari, Pjetër Arbnori, ndërkohë janë tërhequr prej vitesh themelues të tjerë si Aleksandër Meksi, Genc Ruli, Rexhep Uka, Neritan Ceka, Arben Imami, Arben Demeti, Preç Zogaj etj. Janë larguar gjenerata të mëvonshme politikanësh të kohës së Astrit Patozit, Majlinda Bregut etj. Por në krye të PD-së ka mbetur Sali Berisha.
Në krahun tjetër, elita drejtuese e PS-së është ndryshuar plotësisht. Është tërhequr nga politika lideri historik i kësaj partie Fatos Nano. Ai dha dorëheqjen në shtator 2005 kur humbi zgjedhjet dhe nuk u kthye më me rol aktiv në politikë. Janë tërhequr nga politika të gjtihë themeluesit dhe ish-drejtuesit e forumeve të kësaj partie si Servet Pëllumbi, Gramoz Ruçi, Arta Dade, Namik Dokle, që i përkasin elitës së vitit 1990. Janë larguar edhe politikanë të brezave të mëvonshëm dhe në forumet drejtuese të PS-së janë aktualisht breza të rinj. PS është në përfundim të mandatit të tretë qeverisës, ndërsa PD ka numëruar në këto 12 vite, gjashtë humble dërrmuese në zgjedhje parlamentare dhe lokale.
Me një barrë të rëndë të akuzave për korrupsion, i shpallur nongrata nga Shtetet e Bashkuara të Amerikës dhe Britania e madhe, me një parti të sfilitur që vetë e ka shkatërruar, në moshën 80-vjeçare, Sali Berisha pretendon të riktheje Partinë Demokratike në pushtet, pas një serie humbjesh zgjedhore në 12 vite.
