Shumë të rinj shqiptarë punojnë në Call Center por shpeshherë duhet të përballen edhe me sjelljen skandaloze dhe aspak njerëzore të supervizorëve.
Një rast konkret është denoncuar me video se si supervizorja e një Call Centeri u bërtet me të madhe punonjësve, duke u kërkuar llogari për punën.
Video është denoncuar nga një ish-punonjës i Call Center, i cili e ka publikuar tek Jeta Osh Qef.
“Unë jam një ish-punonjës (operator) në një Call Center në Tirane (IDS) dhe po ju dërgoj një video që paraqet diskriminimin, presionin, abuzimin psikologjik që ndodh në këtë call center. Dua që ta publikoni këtë material ju lutem, që ta shohin të tjerët se çfarë presioni dhe dhune psikologjike ndodh në këtë kompani”, thotë denoncuesi.
Çfarë thotë supervizorja:
Kemi ardhur këtu për të bërë lekë, për të justifikuar rrogën, siguracionin, çdo gjë që na paguhet. Nuk po kërkoj që secili nga ju të bëj nga dy kontrata në ditë, apo të bëni kontrata. Ju kam kërkuar të bëni kontrata apo ju kam kërkuar të zgjatni telefonatat? Ça po bëni? Apo doni t’ju themi bëni kontrata dhe ndryshe jeni të pushuar? Disa prej jush kanë një vit që punojnë këtu. Po ju japim bonuse. Futjuni punës! Kaq po ju them.
Ky nuk është një fenomen i izoluar, pasi të tjerë punonjës apo ish-punonjës të Call Center-ave janë ankuar më parë në redaksinë e Syri.net për sjelljen e supervizorëve të tyre.
