Janë publikuar të tjera pamje nga arrestimi i 20-vjeçarit K.S, autorit të vrasjes së bashkëmoshatarit të tij në Korçë.
Siç shikohet në pamje, arrestimi i autorit të krimit të rëndë në Korçë ka ndodhur në mesnatën e 8 gushtit.
Në video, shihet autori teksa qëndron në këmbë. Menjëherë i afrohet një oficer policie, që e kap nga qafa dhe e shtrin në tokë.
Më pas, në ndihmë të oficerit vijnë dhe kolegët e tij, duke prangosur të riun, të dyshuar për vrasje.
I arrestuari K.S ekzekutoi me kallashnikov në 8 gusht bashkëmoshatarin dhe shokun e fëmijërisë, Johan Zukon, teksa i ishte vënë mbrapa këtij të fundit me armë në dorë. Autori e ndoqi viktimën në shkallët e një pallati, aty ku e qëlloi dhe e la të vdekur.
Në dëshminë e dhënë në polici, autori i dyshuar K.S ka thënë se përplasjet me Zukon kishin nisur prej disa kohësh. Autori ka deklaruar se një nga shkaqet e përplasjes ka qenë edhe fakti se viktima i kishte ngacmuar të dashurën. Hetuesit kanë dyshime se vrasja mund të ketë ndodhur, edhe për shkak të pretendimeve të palëve, për të qenë “i forti i lagjes”.
Pas ngjarjes, K.S u largua nga vendi i krimit dhe qëndroi i fshehur në një zonë pranë varrezave të qytetit. Rreth 6 orë më vonë, ai u largua nga zona dhe u afrua drejt banesës së tij. Pikërisht në këtë moment u pikas nga forcat e Policisë, të cilat ndërhynë menjëherë për arrestimin në flagrancë.
