Policia e Tiranës ka vënë në pranga 31-vjeçarin F.K., pasi një ditë më parë (të martën) ka dhunuar punonjësin e Policisë Rrugore te rrethrrotullimi i i Unazës së Re.
Në një raportim për mediat, uniformat blu bëjnë me dije se 31-vjeçari nuk i është bindur urdhrit për të ndaluar automjetin e tij dhe në momentin e lëvizjes ka tërhequr zvarrë punonjësin e policisë duke i vënë jetën në rrezik.
Më pas ai ka kundërshtuar për të paraqitur dokumentacionin përkatëse dhe ka goditur punonjësi e policisë duke i shkaktuar dëmtime fizike.
Njoftimi i policisë:
Më datë 18.03.2025, te rrethrrotullimi i Unazës së Re, në rrugën “Sotir Caci”, punonjësi i Komisariatit të Policisë Rrugore Tiranë, i planëzuar me shërbim, i ka bërë shenjë ndalimi një automjeti, pasi ka konstatuar lëvizje të pakontrolluara në rrugë. Drejtuesi i automjetit nuk i është bindur urdhrit të punonjësit të Policisë për të ndaluar, por ka vijuar lëvizjen. Duke vijuar lëvizjen, drejtuesi i automjetit e ka tërhequr punonjësin e Policisë, për disa metra, duke i rrezikuar jetën. Punonjësi i Policisë e ka ndjekur dhe ndaluar automjetin, dhe i ka kërkuar drejtuesit, t’i paraqesë dokumentacionin. Drejtuesi i automjetit e ka kundërshtuar dhe më pas e ka goditur punonjësin e Policisë, duke i shkaktuar dëmtime fizike.
Shërbimet e Policisë kanë shoqëruar në Komisariat drejtuesin e automjetit, dhe në përfundim të veprimeve procedurale për rastin, specialistët për Hetimin e Krimeve të Komisariatit të Policisë Nr. 4 bënë arrestimin në flagrancë të tij, konkretisht shtetasit F. K., 31 vjeç, banues në Tiranë.
Materialet procedurale iu referuan Prokurorisë së Tiranës, për veprime të mëtejshme.
