Dy piktura shkëmbore të krijuara rreth 3000 deri në 4000 vjet më parë janë zbuluar në provincën Gansu, në veriperëndim të Kinës, konfirmuan autoritetet lokale.
Pikturat u gjetën në anën e një kodre në bregun lindor të Lumit të Verdhë, rreth 2 km në juglindje të fshatit Yuwanquan në rrethin Pingchuan, në qytetin Baiyin.
Njëra prej pikturave është 2.4 metra e gjatë dhe 3.9 metra e gjerë me gjashtë përshkrime që shfaqin dele, drerë dhe një zagar. Piktura tjetër, e cila u gjet rreth pesë metra larg, është 2.2 metra e gjatë dhe 2.3 metra e gjerë dhe përmban pesë imazhe. Tre nga imazhet ishin dëmtuar, ndërsa dy të tjerat ishin të plota, shkruan “Xinhua”.
Studiuesit kanë vërejtur se pikturat shkëmbore të gjetura në Gansu janë të vendosura kryesisht në male të largëta ose lugina lumenjsh. Vendndndodhja e tyre e largët dhe ekspozimi natyror e bëjnë të vështirë mbrojtjen.
Për të ruajtur informacionin historik në pikturat shkëmbore, Gansu ka krijuar një bazë të dhënash të imazheve dixhitale të artit shkëmbor. Në vitin 2023, provinca përfundoi mbledhjen e të dhënave me saktësi të lartë të 72 relikteve të artit shkëmbor.
