Hamdi Salihi vazhdon të gjejë rrugën e rrjetës me ritme të admirueshme në këtë sezon në Austri, me skuadrën e Viener Nojshtad e cila falë sulmuesit shqiptar është kthyer në superfuqinë e kategorisë së dytë austriake.
Ai gjeti golin e avantazhit për ekipin e tij në minutën e 27-të, duke dërguar topin në rrjetë me një diagonale të pakapshme për portierin kundërshtar.
Sulmuesi përsëriti veten në minutën e parë të pjesës së dytë, kur pasi fitoi një top para zonës kundërshtare, arriti të kalonte portierin e Vetens me një tjetër goditje të zgjuar.
Viener Nojshtad pësoi një gol në minutën e 80, por arriti të mbronte këtë rezultat të rëndësishëm 2-1 deri në vërshëllimën përfundimtare.
Me dygolëshin e realizuar sot, Salihi çoi në 6 bilancin e tij të realizimeve sezonale, në vetëm 7 ndeshje të luajtura me skuadrën austriake./Panorama/a.m.
