Një nënë dhe djali i saj 9-vjeçar u vranë në sulmet me dronë rusë në rajonin kufitar Sumy të Ukrainës, tha sot kreu i komandës ushtarake lokale, Oleh Khryhorov.
Dy dronë i vunë zjarrin një shtëpie private dhe e shkatërruan atë, duke vrarë nënën 29-vjeçare dhe djalin e saj, tha Khryhorov në një postim në Telegram.
Katër persona të tjerë u plagosën, përfshirë babanë dhe gjyshen e djalit, të cilët u dërguan në spital me djegie të rënda.
Ndërkohë, në qytetin Smila të Ukrainës qendrore, pesë persona u plagosën nga një sulm me dron rus, sipas zyrës së prokurorit rajonal të Cherkasy. Autoritetet e përshkruan sulmin si një sulm masiv ndaj infrastrukturës civile.
Presidenti ukrainas Volodymyr Zelensky ka bërë thirrje për presion mbi kompanitë që të ndërpresin furnizimet e komponentëve nga jashtë. Rusia po përdor rreth 220 bomba me rënie të lirë në ditë kundër komuniteteve në vijën e frontit, të cilat i prodhon dhe i përshtat pavarësisht sanksioneve, shkroi ai.
Kërcënimet ruse përpara dimrit
Në një postim në Telegram sot, Ministria Ruse e Mbrojtjes kërcënoi se do ta ngrijë Ukrainën gjatë dimrit.
“Do të ngrini këtë dimër”, shkroi ajo nën një foto të dronëve në fluturim.
Ushtria ukrainase u përgjigj duke postuar një foto të një reje tymi mbi një objekt nafte në Rusi.
“Do të ngrohemi në zjarrin e rafinerive ruse”, tha ajo.
Dimrin e kaluar, Moska kreu sulme masive në rrjetin energjetik të Ukrainës, duke lënë miliona ukrainas pa energji elektrike, ujë dhe ngrohje, ndërsa temperaturat ranë nën zero gradë.
Kundërsulmet ukrainase kundër Rusisë
Ndërkohë, forcat ukrainase vazhduan kundërsulmet e tyre kundër Rusisë. Guvernatori Alexander Drozdenko tha se 51 dronë u kapën mbi rajonin e Leningradit, i cili rrethon Shën Petersburgun, pasi një zjarr shpërtheu në portin e Ust-Lugës.
Ai tha se dëmet e shkaktuara nga sulmi me dron po riparoheshin shpejt. Porti baltik i Ust-Lugës është një qendër e madhe për eksportimin e gazit natyror të lëngshëm, plehrave dhe qymyrit, dhe ka qenë shënjestër e sulmeve ukrainase në disa raste të mëparshme.
Dëmet u raportuan gjithashtu nga autoritetet në rajonin Tver, në veriperëndim të Moskës. Mbetjet e dronit që binin dëmtuan murin e një depoje që i përkiste kompanisë së tregtisë elektronike Wildberries. Nuk u raportuan të lënduar.
Woman and a 9-year-old child were killed, and 4 others were injured, in a russian strike on Sumy region‼️ pic.twitter.com/Ct8mNnqY9V
— Kate from Kharkiv (@BohuslavskaKate) August 14, 2026
