Kryeministri Edi Rama ka postuar në rrjetin e tij social një video të projektit të Lungomares në Vlorë, ku ka shkruar se iniciativa do të përfundojë dhe në fund të saj do të jetë një portë e bukur shqiptare e Mesdheut.
Pavarësisht se ky projekt është kritikuar mjaft jo vetëm nga opozita por edhe nga qytetarët e Vlorës(zonë në të cilën ndodhi dhe aksidenti ku humbi jetën 17 vjeçari Kristi Panajoti), kryeministri është shprehur se Lungomare do të transformojë të gjithë qytetin.
“Vlora do të bëhet, një portë e bukur shqiptare e Mesdheut, pas vitesh e vitesh të tëra harrese dhe pasioni ynë për Vlorën do të përkthehet, hap pas hapi, në vepra publike që do të lehtësojnë frymëmarrjen e mbetur prej kaq shumë vitesh e do ta fusin Vlorën në hartën e turizmit mesdhetar si një qytet me ekonomi e shoqëri të ripërtërirë…
Rruga e re e Rilindjes për Vlorën është e mundimshme por pa kthim dhe transformimi i Vlorës do të jetë shembullor në historinë e qytetit e të fshatrave të saj të bukur…”– shkruan Rama.
