Copa metali e plastike që vijnë rrotull Tokës përfaqësojnë një nga sfidat më të mëdha ambientaliste për njerëzimin. Veprimtaria hapësinore përreth planetit Tokë që nga viti 1957 deri në ditët tona ka krijuar rreth 100 milionë mbetje që sillen në hapësirë rreth Tokës, sipas “Skynews”. 27 mijë nga këto mbetje hapësinore kanë një gjerësi prej afërsisht 10 centimetra. Ndërsa mbetja më e madhe që sillet rreth tokës, është një teleskop i dalë jashtë funksionit, i cili ka madhësinë e një autobusi londinez 2-katësh.
Mbetjet hapësinore janë një nga sfidat e radhës të Presidentit të zgjedhur të Shteteve të Bashkuara të Amerikës, Donald Trump. Sipas një zyrtari të Forcave Ajrore të Amerikës për hapësirën administrata “Trump” duhet të mendojë për vendosjen e standardeve ndërkombëtare për menaxhimin e mbetjeve hapësinore.
Problemi që paraqesin mbetjet hapësinore përreth Tokës është se ato mund të përplasen me satelitë, duke shkaktuar dëme, ose të rrëzohen në planetin tonë. Nga ana tjetër, duke u përplasur me njëra-tjetrën, mbetjet hapësinore krijojnë akoma më shumë mbetje. Kjo krijon mundësinë për të nisur një skenar, ku mbetjet në hapësirë prodhojnë akoma më shumë mbetje të tjera duke u përplasur në vazhdimësi më njëra-tjetrën, pasi copëzohen. Një situatë e tillë do të bënte që të ulej ndjeshëm veprimtaria hapësinore e njerëzimit, çka do të sillte probleme, ndër të tjera, në fushën e komunikimit.
BW/d.i.
