Rrezikon të mbytet në Palasë publicisti i njohur italian Vittorio Sgarbi i cili po pushon në bregdetin shqiptar të Jugut këto ditë.
“Momente frike për Vittorio Sgarbin pasditen e djeshme në një plazh në bregdetin e Palasës, në jug të Shqipërisë, ku ishte mysafir”. Kështu shkruhet në uebsajtin zyrtar të kritikut italian të artit dhe politikanit.
Aty janë publikuar edhe pamjet e momenteve të frikshme që ka zgjatur disa minuta.
Teksa ishte futur në det për t’u larë, kritiku i njohur i artit u rrezikua nga dallgët e forta për shkak të kohës jo të mirë. Ka qenë vajza e tij Alba dhe një roje shpëtimi nga resorti ku ndodhet publicisti që e kanë ndihmuar për ta nxjerrë në breg.
Por Vittorio Sgarbi ka reaguar për herë të parë pas incidentit në jug të vendit ku për pak e morën dallgët e detit. Kritiku i njohur italian thotë se ajo që ka ndodhur ishte një pagëzim shqiptar.
“Cdo gjë ok, jam mirë. Momenti më i mirë ka qenë kur u zhyta në ato dallgë të mrekullueshme që për pak më morën me vete, por dola më i forta. Vajza ime më shpëtoi, ka qenë një pagëzim shqiptar” tha Vittorio Sgarbi.
Video-mesazhin e ka publikuar kryebashkiaku i Vlorës Dritan Leli që po e shoqëron në turin e tij në Shqipëri. “Jam me Vittorio Sgarbi, gëzon shëndet të plotë për të gjitha ata që janë të shqetësuar. Sapo kemi vizituar Butrintin, Sarandën, Gjirokastrën dhe tani nga Tepelena po udhëtojmë drejt Beratit” tha Leli.
g.kosovari
