Militantët nga grupi islamik në pushtet i Sirisë, Hayat Tahrir al-Sham, raportohet se janë angazhuar në një aksion për të eliminuar besnikët e regjimit të Bashar al-Assad.
Por, gjatë këtij aksioni që zhytur vendin sërish në krizë, ata shihen duke “u kënaqur” me rrahjen, torturimin dhe ekzekutimin edhe të civilëve të pafuqishëm në komunitetet alavite përgjatë bregut perëndimor të vendit.
Më shumë se 1,000 njerëz thuhet se janë masakruar ndërsa militantët e HTS-së kanë filmuar veten duke rrahur civilët e paarmatosur.
Qeveria e HTS në Damask pretendon se aksioni në bregun perëndimor të Sirisë rreth Latakias u nis për të mposhtur grupet besnike pro-Asad që kishin sulmuar pikat e kontrollit të sigurisë më 6 mars.
Por, Daily Mail raporton se provat, shumica e tyre të siguruara nga vetë militantët e HTS, tregojnë se pjesa më e madhe e dhunës u krye kundër civilëve të paarmatosur.
Kur HTS mori pushtetin në Siri me një grusht shteti që rrëzoi ish-presidentin Bashar al-Assad në dhjetor, udhëheqësi Ahmed al-Sharaa pohoi se pakicat e ndryshme fetare dhe etnike të Sirisë do të ishin të sigurta nga persekutimi dhe dhuna.
HTS, një grup islamik sunit, u formua për herë të parë në vitin 2012 me emrin Jabhat al-Nusra dhe ishte krahu sirian i Shtetit Islamik të Irakut – më pas një degë e Al-Kaedës.
Në vitin 2017, grupi iu nënshtrua një riemërtimi, duke ndërprerë lidhjet me Al-Kaedën dhe duke kthyer emrin në HTS pasi udhëheqësi Ahmed al-Sharaa u përpoq të moderonte qëndrimin e tij për të fituar legjitimitet.
Që nga marrja e pushtetit në dhjetor 2024, HTS ka sunduar nga Damasku, duke konsoliduar kontrollin e tyre mbi pjesën më të madhe të Sirisë perëndimore dhe qendrore.
