Moska po përgatitet për luftë, kamionë me rërë kanë bllokuar hyrjen e qytetit dhe barrikada janë ngritur për të parandaluar hyrjen e mercenarëve të Ëagner në qytet.
Shefi i Wagner-it, Yevgney Prigozhin, nisi një rebelim ushtarak kundër Kremlinit gjatë natës së të premtes me autokolonën e forcave të armatosur që pretendon se ka marrë 2 baza të armatosura të rëndësishme në Rusi.
Putin iu drejtua popullit rus të shtunën, duke paralajmëruar se udhëheqësi ushtarak e kishte ‘goditur me thikë pas shpine’, ndërsa Moska përgatitet të futet në rrethim, me trupat ushtarake që po pozicionohen për të mbrojtur qytetin.
Në kryeqytetin rus janë pozicionuar postbllokët e mitralozëve si dhe mjetët e blinduara janë filmuar në rrugët e qytetit.
Të gjitha pamjet që vijnë nga kryeqyteti rus japin pamje se do të kemi një përplasje të armatosur.
Grupi Ëagner pretendon se ka marrë kontrollin e të gjitha objekteve ushtarake në qytetin jugor të Rostov-on-Don, mediat e huaja raportojnë se mercenarët kanë marrë dhe objekte në Voronezh – qytet më në veri.
Rostov ka luajtur një rol kyç që nga pushtimi i plotë i Ukrainës nga Rusia në shkurt 2022.
I vendosur afër kufirit me Ukrainën, Rostov – me një popullsi prej vetëm një milion – strehon selinë kryesore të Qarkut Ushtarak Jugor të Rusisë.
Trupat ruse shpesh vendosen në qytet përpara se të dërgohen në Ukrainë.
Kryeqyteti rajonal ka qenë gjithashtu një qendër e rëndësishme logjistike për dërgesat e armatimit dhe karburantit.
Voronezh – një tjetër kryeqytet rajonal jo shumë larg kufirit ukrainas – ka përafërsisht të njëjtën madhësi si Rostov.
Administrata e presidentit të Federatës Ruse ka frikë se brenda pak orësh trupat Wagner të Yevgeny Prigozhin mund të gjenden jo shumë larg Moskës dhe luftimet do të fillojnë afër kryeqytetit.
Lajmi u bë i ditur nga agjencia investigative “Meduza” duke iu referuar bashkëbiseduesve në inteligjencën ukrainase.
Pasi Wagner morën kontrollin e Rostov-on-Don në mëngjesin e 24 qershorit, “u kuptua se çështja ishte serioze”.
Një burim i afërt me qeverinë ruse, si dhe një bashkëbisedues pranë Kremlin-it, thonë se Prigozhin “filloi të bujë” rreth dy javë më parë – pasi Putin tha se për të vazhduar armiqësitë në Ukrainë, PMC-ve u kërkohej të nënshkruanin një kontratë zyrtare me Ministrinë e Mbrojtjes të Federatës Ruse.
Themeluesi i PMC Wagner ka një konflikt të gjatë me këtë departament.
Një nga burimet pranë administratës së presidentit pranon se problemi ishte nënvlerësuar edhe në Kremlin.
“Ata e diskutuan në takime, ranë dakord që ai është një aventurier i guximshëm dhe nuk ndjek rregullat. Rreziku i një rebelimi ushtarak ishte pothuajse zero”, shtoi ai.
Tani Kremlin-i ka besim se ushtria dhe forcat e sigurisë do të jenë në gjendje të ndalojnë kolonat e PMC-së së Wagner.
Në të njëjtën kohë, një nga bashkëbiseduesit nuk ka dyshim se të paktën disa mercenarë do të jenë në gjendje të “depërtojnë në Moskë”.
Gazeta ruse “Vedomosti” ka postuar pamje të ushtarëve rusë të cilët kanë ngritur një pritë të armatosur në skajin jugperëndimor të Moskës.
Shefi i Wagner-it Yevgeny Prigozhin pohoi se forcat e tij janë qëlluar me artileri dhe helikopterë.
Ai shtoi se Wagner ka marrë kontrollin e shtabit ushtarak rus në Rostov pa gjuajtur asnjë të shtënë arme.
Lajmi u bë i ditur nga kanali “Telegram” i Prigozhin duke cituar audio mesazhin e tij.
Helikopterët ushtarakë rusë hapën zjarr më herët mbi një kolonë mercenarësh Wagner tashmë më shumë se gjysmën e rrugës drejt Moskës, raportoi Reuters, në një avancim rrufe pasi pushtuan qytetin jugor të Rostov-on-Don gjatë natës.
Një gazetar i Reuters pa helikopterët e ushtrisë duke hapur zjarr ndaj një kolone të armatosur Wagner që po përparonte pranë qytetit të Voronezh-it me transportues trupash dhe të paktën një tank në një kamion me shtrat të sheshtë.
Qyteti është më shumë se gjysma e rrugës përgjatë autostradës 1 mijë e 100 kilometra nga Rostovi në Moskë.
Autoritetet në rajonin e Lipetsk-ut të Rusisë u kërkuan njerëzve të qëndrojnë brenda shtëpive të tyre për arsye sigurie.
Ata lëshuan paralajmërimin mes raporteve se mercenarët rebelë të Wagner po kalonin tranzit në rajon gjatë rrugës për në Moskë./m.j
