Nikoll Pashuku në Shënkoll të Lezhës në çdo moment, ditën dhe natën mban një armë në dorë. Ti afrohesh shtëpisë së tij është pak frikë. Thotë se hajdutët në zonë po bëjnë kërdinë dhe si të vetmen zgjidhje për tu mbrojtur, ishte arma me leje.
Kemi mbetur tashmë të presim radhën se kur do të vijnë të na vjedhin. Me leje e kam armën, dhe duhet ta mbajmë te koka e krevatit”, thotë ai për Report Tv.
“Policia ka marrë fund. Se ka polici pushteti dhe jo shteti”, thotë Pashuku.
“Është bërë denoncimi dhe policia ka ardhur. Kanë bërë ekspertizën dhe nuk u morën më me këtë punë”, shprehet një tjetër banor.
“Të kesh frikë në shtëpinë tëndë, e di ç’do me thënë?”, thotë një grua.
Në fshatrat e Njësisë Administrative të Shënkollit në dy muajt e fundit çdo natë është regjistruar një vjedhje. Në një familje, vodhën makinë dhe mallra ushqimore.
“Më kanë ardhur një natë dhe më vodhën makinën, gjeneratorin e dritave, motorin e barit, motosharrën, 150 litra raki, 120 kg mjaltë etj! Çfarë kanë gjetur”, thotë kryefamiljari.
Edhe kjo zonjë e shtëpisë, fëmijët e së cilës ndodhen në emigrim, nuk fle natën. Ajo rri zgjuar më të njëjta rrobe që përdor edhe gjatë ditës. Është e frikësuar dhe kërkon ndihmë.
“Nga ora 1 deri në 4 të mëngjesit zgjuar rrimë ccdo natë. Unë për vetë po. Me rroba veshur fle”, thotë një banore.
Referuar të dhënave vetëm gjatë 2 muajve të fundit në fshatrat e Shënkollit kanë ndodhur rreth 50 vjedhje. Pak ditë më parë policia arrestoi babë e bir, ndërsa një person tjetër u shpall në kërkim. Ata dyshohet të jenë autor të disa vjedhjeve në zona të ndryshme të Lezhës, përfshire dhe Shënkollin.
