Gati tri dekada pas vdekjes së tij, shteti kolumbian ka marrë nën kontroll “La Manuela”-n, rezidencën verore që Pablo Escobar pati ndërtuar për familjen, e sidomos për të bijën.
Banesa ishte pushtuar ilegalisht nga një familje, e cila kishte krijuar aty një biznes të sajin me shëtitje turistike, kuzhinë dhe sporte.
Qeveria kolumbiane e konfiskoi vilën në vitin 2005, pas një procesi ligjor që përfshinte sekuestrimin e aseteve kriminale, por vetëm me letra, përcjell tch.
“Mbreti” i kokainës e kishte blerë pronën në Guatapé pas lindjes së vajzës së tij, Manuela, në vitin 1984, e në nder të saj i kishte vënë edhe emrin.
E gjithë ndërtesa ka mure dyshe, me qëllimin që brenda tyre të fshiheshin lehtësisht para dhe kokainë, ndërsa luksin ia shtonte një disko private, një pishinë, një sallë madhështore të ftuarish, një fushë tenisi dhe një fushë futbolli, që përdorej edhe si pistë për uljen e helikopterëve.
Një grup i quajtur “Los Pepes”, i krijuar nga karteli rival me Escobarin, “Cali”, e dëmtoi keqas “La Manuela”-n në vitin 1993 me shpërthimin e 200 kg tritol.
Escobari arriti asokohe të largohej në kohë, vetëm për t’u vrarë pak më vonë atë vit, në qytetin e tij të lindjes Medelin.
Pas vdekjes së të atit, Manuela Escobar u largua bashkë me të ëmën drejt Argjentinës, e nuk u kthye më.
g.kosovari
