Kushdo që mendon se aksioni anti-informalitet është thjesht një fushatë e ka gabim.
Kryeministri Edi Rama ka njoftuar sot se kjo është sipas tij një “fazë e re e shtetbërjes, e cila do të vazhdojë deri në Qershor 2021”.
Rama postoi një video në Sarandë, me forca të përqëndruara inspektimi nën drejtimin e Drejtores së Përgjithshme të Tatimeve, Delina Ibrahimaj, për të goditur subjektet hoteliere, që abuzojnë me konsumatorin dhe shtetin, duke dëmtuar konkurentët e rregullt!
Ibrahimaj tha se janë kryer 420 inspektime dhe në një pjesë të mirë të subjekteve janë konstatuar shkelje të rënda.
Ajo shpjegoi se qëllimi kryesor i këtij operacioni nuk është goditja ndaj bizneseve, por forcimi i konkurrencës së ndershme dhe goditja e rasteve të paligjshmërisë, të cilat dëmtojnë ekonominë dhe përkeqësojnë klimën e biznesit.
“Në të gjithë muajin korrik dhe gusht kemi qenë në të gjithë vijat bregdetare për të kontrolluar bizneset. Janë kryera 420 inspektime, ku janë gjetur 191 tatimpagues me shkelje, 30 prej të cilëve kanë vepruar pa licencë dhe ua është bllokuar aktiviteti deri në regjistrimin e tyre. Plani operacionet nuk ka për qëllim që të sulmojë subjektet, por ka për qëllim që të nxisë konkurrencën e ndershme”, tha ajo.
g.kosovari
