Në Shapinsay të Skocisë, një polic i dalë në pension është bërë hero, pasi i ka shpëtuar jetën një shoferi i cili kishte ngecur i mbyllur brenda veturës që fundosej në det.
Alexander Glasgow ka dashur të hipë në traget por nuk ka mundur, derisa vetura ka lëvizur poshtë platformës dhe ka rënë në ujë, transmeton Telegrafi.
Meqenëse 24-vjeçari nuk ka pasur mundësi ta hapë derën e veturës, në ndihmë i ka dalë Stuart McIvor.
Ish-polici 71-vjeçar është nisur për tek vetura dhe pasi e ka nxjerrë djaloshin nga dritarja, i ka ndihmuar të notojë deri te bregu.
Në videon e publikuar, shihet vetëm pjesa e sipërme e veturës ngjyrë gri, pas intervenimit për shpëtim.
“Pa menduar mire se çfarë po bëj, e gjeta vetën në ujë. Jam i moshuar, por kam punuar si polic për 32-vjet, ndërsa më parë si zjarrfikës. Unë nuk jam hero, vetëm se u ndodha në vendin e duhur. Atë e kishte zënë paniku dhe dridhej, kurse unë vetëm i dhashë një nxitje dhe e ndihmova të dal duke notuar”, ka thënë ai për media. /Telegrafi/a.m.
