Ministri i Shëndetësisë, Ilir Beqaj, ka postuar në Facebook historinë e një pacienteje që vuante nga zemra dhe që ka përfituar nga rimbursimi i një ilaçi të shtrenjtë.
“Rreth 100 mijë lekë i duheshin Meliha Mekollit për të siguruar kurën e domosdoshme për sëmundjen e saj në zemër. Prej më shumë se 5 muajsh, 67-vjeçarja nga Tirana përfiton nga rimbursimi falas për herë të parë i ilaçit të kushtueshëm “Entresto”, i domosdoshëm për kurimin e sëmundjes së saj.
Kjo është një tjetër copëz nga mijëra historitë njerëzore që kanë përfituar drejtpërdrejtë nga ndryshimi që ka filluar tashmë në shëndetësinë tonë!
Sot, mbi 150 mijë pacientë përfitojnë nga kurimi me 141 barnave të reja #FALAS që kemi shtuar në listën e rimbursimit në vetëm 3 vjet.
Por lajmet e mira nuk mbarojnë këtu: Nga 1 janari 2017, edhe 600 mijë të pasiguruar përfitojnë rimbursim 100% të barnave.
Sigurisht që rruga e Rilindjes së Shëndetësisë është e vështirë dhe plagët e të shkuarës kanë ende nevojë për reformim rrënjësor, punë të palodhur e durim të madh për t’u kuruar.
Por nga ku u nisëm tre vjet më parë, kemi shënuar progres inkurajues duke shpëtuar e lehtësuar jetë njerëzish që deri dje ishin të pashpresë dhe pa asnjë kujdes dinjitoz shëndetësor”, shkruan Beqaj.