Protesta e opozitës, e zhvilluar pasditen e së hënës në kryeqytet, ka nisur me tensione mes protestuesve dhe drejtuesve të automjeteve, për shkak të bllokimit të rrugëve kryesore në Tiranë.
Përplasja e parë u shënua te mbikalimi i Pallatit me Shigjeta, ku një nënë që shoqëronte fëmijën e saj të sëmurë u ndalua nga turma e protestuesve. Ajo kërkoi me ngulm të hapet rruga, duke theksuar urgjencën për të shkuar në spital.
“Nuk jam e njoftuar fare për këtë. Ju lutem, hapni rrugën, kam fëmijën për spital. Policit i thashë ta hapë rrugën. Po, kam fëmijën për spital, ju lutem”, u shpreh gruaja në mënyrë të përsëritur.
Tensione pati gjithashtu mes kreut të grupit parlamentar të PD-së, Gazment Bardhi, dhe drejtuesve të policisë në terren. Bardhi akuzoi policinë se duhej të merrte masa për të ridrejtuar trafikun, ndërsa theksoi se protesta është një e drejtë kushtetuese.
“Nuk merret leje nga policia për të protestuar. Ne ju kemi njoftuar, dhe është detyra juaj të menaxhoni trafikun,” deklaroi Bardhi.
Policia vijon përpjekjet për të garantuar qarkullimin e automjeteve, ndërkohë që protestuesit mbeten të vendosur në bllokimin e rrugëve si formë presioni ndaj qeverisë.
Akset e kërkuara për zhvillimin e protestës janë: “Unaza e Vogël”, “rrethrrotullimi te Zogu i Zi”, ura afër xhamisë në Rrugën e Elbasanit, sheshi “Willson” dhe rruga nga “Pallati me Shigjeta” drejt “Rrugës së Kavajës”.
Akset e bllokuara janë: “Unaza e Vogël”, “rrethrrotullimi te Zogu i Zi”, ura afër xhamisë në Rrugën e Elbasanit, sheshi “Willson” dhe rruga nga “Pallati me Shigjeta” drejt “Rrugës së Kavajës”.
