Një 21-vjeçar i pastrehë ka tentuar të vjedhë një bankë të nivelit të dytë në Tiranë, më 8 mars 2017, duke thyer me mjete të forta derën e saj. Ai është larguar pa marrë gjë dhe të nesërmen është vetëdorëzuar në polici, ku ka pranuar krimin.
“E bëra për mbijetesë. Kisha disa ditë pa ngrënë”, është shfajësuar ai para oficerëve të policisë dhe më pas edhe në gjykatë gjatë gjykimit. I akuzuari për këtë ngjarje, Nazmi Çaka, u deklarua fajtor nga Gjykata e Tiranës për akuzën e “vjedhjes së bankave dhe arkave të kursimit”, mbetur në tentativë.
Ai u dënua me 2 vjet e 6 muaj burg. Për shkak të gjykimit me procedurë të shkurtuar, ai përfitoi uljen e një të tretës së dënimit dhe përfundimisht duhet të vuajë 1 vit e 8 muaj heqje lirie.
Sipas Gjykatës, nga aktet dhe provat e paraqitura në gjykim, ka rezultuar se në datën 5 mars 2017, në orën 00:05, në sallën operative të Drejtorisë Vendore të Policisë së Tiranës është dhënë njoftimi se një rrugën “Llazi Miho”, një person i panjohur kishte thyer xhamin e filialit të një banke të nivelit të dytë dhe ishte futur brenda.
Pasi kishte kontrolluar sirtarët, ai ishte larguar pa vjedhur ndonjë send. Nga ana e oficerëve të Policisë Gjyqësore është bërë këqyrja e vendit të ngjarjes, ku janë marrë gjurmë dhe shenja gishtërinjsh, si edhe është administruar një kopje e pamjeve filmike të kamerave të sigurisë së bankës.
Nga këqyrja e pamjeve filmike është vënë re një person i veshur me xhup dhe me kapuç, i cili në orën 00:05 të datës 5 mars 2017, qëllon dy herë me gurë derën e xhamit të bankës, duke e thyer atë. Ky person është futur brenda, kontrollon te sporteli dhe largohet pa marrë ndonjë send me vete. Ai është larguar një minutë më vonë.
Sipas Gjykatës, pak orë pas ngjarjes, i pandehuri Nazmi Çaka është paraqitur në polici, ku ka treguar se ishte autori i tentativës së vjedhjes së bankës. Ai ka rrëfyer me detaje para oficerëve të Policisë Gjyqësore gjithë mekanizmin e ngjarjes dhe veprimet e kryera prej tij, të dhëna që përputhen plotë- sisht me pamjet filmike të ngjarjes.
Gjatë gjykimit, i pandehuri ka shfaqur pendesë për kryerjen e krimit, rrethanë që është provuar edhe nga vetëdorëzimi i tij në polici. Ai ka rrëfyer se jeton i vetëm, se nuk ka një banesë dhe se prindërit i kanë vdekur kohë më parë.
Ai ka pretenduar se krimin e ka kryer i shtyrë nga nevoja për mbijetesë, pasi kishte disa ditë pa ngrënë. Sipas vendimit, në masën e dënimit, Gjykata ka mbajtur parasysh edhe faktin se i pandehuri është i padënuar më parë dhe pendesën e tij, për shkak të vetëdorëzimit pas ngjarjes./ma.me
