Një vit më parë ambasadori i SHBA në vendin tonë, Donald Lu, së bashku me stafin e ambasadës amerikane, përshëndetën qytetarët shqiptarë për festat e fundvitit me këngën “Ja na erdhi viti i ri”. Dhe me sa duket, kjo mënyrë e veçantë e ambasadorit Lu për t’i uruar shqiptarëve Krishtlindjen dhe Vitin e Ri, është kthyer tashmë në një traditë.
Këtë fundvit, 40 diplomatë amerikanë dhe anëtarë të personelit vendas, përfshi Ambasadorin Donald Lu, kanë zgjedhur një tjetër këngë, po aq festive sa ajo e një viti më parë.
I veshur me kapuç, dorashka dhe shall, ambasadori Lu këndon këngën klasike të festave “Jingle bells” në oborrin e ambasadës amerikane në vendin tonë.
Kënga e urimit për këtë fundvit, është realizuar në bashkëpunim me këngëtarët Venera Lumani dhe Lindi Islami.
Videoja demonstron përpjekjet e fundit të Ambasadës së SHBA për t’u lidhur me publikun shqiptar nëpërmjet medias sociale. Një video e postuar vitin e kaluar ku personeli i ambasadës këndonte “Ja na Erdhi Viti i Ri” arriti më shumë se 600,000 shikime në faqen e Ambasadës në rrjetin “Facebook”.
a.ç
