Publikohet video nga ekzekutimi i Devi Kasmit, 4 ditë më parë në Tiranë. Mario Meshini, personi që ishte me të pranë rrugës “Kongresi i Manastirit”, kur 42-vjeçari u qëllua me 5 plumba duke mbetur i pajetë.
Gazeta Shqiptare ka siguruar një video, ku duket Mario Meshini, teksa largohet me motorin e tij vetëm pak minuta pas vrasjes së Kasmit.
Videoja e nxjerr nga kamerat e sigurisë së një biznesi disa metra larg vendit ku mbeti i vrarë 42-vjeçari, tregon Mario Meshinin duke ecur me motor dhe pa skafandër në kokë.
Mario Meshini ishte personi i parë i arrestuar nga policia e Tiranës në lidhje me vrasjen e Devi Kasmit. Ditën e djeshme gjykata vendosi për Mario Meshinin masën e sigurisë arrest me burg. Por ai vetë ka deklaruar se nuk ka lidhje me krimin, dhe se Kasmin e ka takuar pas njohjeve që kishte krijuar me të në një palestër ku shkonim të dy.
Por ndërkohë është e çuditshme se si ai është larguar aq qetësisht nga një skenë e tillë krimi, në të cilën duhej të priste mbërritjen e policisë dhe të jepte detajet mbi atë që pa. Në polici Meshini dha përshkrimin e tij për autorin e dyshuar, duke thënë se ishte me flokë të gjatë, me mjekët, tatuazhe dhe trupmadh.
Dyshimet u ngritën për Meshinin pas mesazhit që ai i kishte dërguar Kasmit, ku i kërkonte që të takoheshin, ndërsa pak më vonë Kasmi u qëllua me armë zjarri për vdekje.
Dje policia arrestoi edhe 4 persona të tjerë, mes të cilëve një shtetas grek që dyshohet të jetë vrasës i paguar për të ekzekutuar Kasmin.
Tre shqiptarët e vënë në pranga akuzohen si bashkëpunëtorë, dhe se kanë siguruar mjetet e nevojshme që greku të bënte krimin. Ndërkohë në Kodër Mëzez, periferi të Tiranës, u zbulua një vilë që shërbente si bazë e një grupi të strukturuar kriminal, organizatori i të cilit është shpallur në kërkim nga policia e Tiranës. Aty u gjetën armatime, drogë dhe të gjitha mjetet e nevojshme për të bërë ekzekutime në forma nga më të ndryshmet, me lëndë eksplozivë, snajpera etj. /GSH.al
