Një operacion i policisë së Tiranës i koduar “Egnatia” ka vënë në pranga dy persona të cilët u kapën teksa tentuan të vidhnin një banesë.
Efektivët e komisariatit Nr. 3, pas njoftimit të marrë se në rrugën “Don Bosko”, në banesën e shtetases S. M., dy persona kishin tentuar të hynin në banesë dhe njëri prej tyre dyshohej se mbante një armë zjarri në dorë, menjëherë kanë shkuar në adresën e dhënë.
Nga ndërhyrja e shpejtë, brenda një kohe të shkurtër, policia identifikoi dhe vuri në pranga autorët e dyshuar, G. A. alias S. H., 23 vjeç dhe E. S., 25 vjeç, të dy banues në Tiranë.
Gjatë kontrollit në banesën e marrë me qira prej tyre, në rrugën “Egnatia”, shërbimet e policisë gjetën dhe sekuestruan në cilësinë e provës materiale armën e zjarrit pistoletë, me një krehër me fishekë, të cilën dyshohet se këta shtetas do ta përdorin për të realizuar vjedhjen.
Aktualisht vijon puna për dokumentimin e ngjarjeve të tjera në të cilat mund të jenë implikuar këta shtetas.
Ndërkohë ndaj të dyshuarve materialet iu referuan Prokurorisë së Tiranës, për veprat penale “Vjedhja e mbetur në tentativë, e kryer në bashkëpunim” dhe “Armëmbajtja pa leje”, për të cilën parashikohet dënimi me burgim deri në 7 vjet.
g.kosovari
