Daniel Drobaj, 18-vjeçari i arrestuar për plagosjen e efektives së “Shqiponjave” Ina Nuka, pasi në drejtim të saj hodhi një kapsollë, rezulton se është ndaluar nga policia dje pak çaste pas protestës së dhunshme para Kuvendit. Report Tv siguron videon e momentit të ndalimit të 18-vjeçarit pranë “Ushtarit të Panjohur” nga disa policë. Aty mbërrin edhe automjeti i një patrulle policie për ta shoqëruar në komisariat të riun e dhunshëm.
Por në ndihmë të tij mbërrijnë të afërm, përfshirë edhe të atin, protestues dhe deputetë të LSI si Luan Rama, Endrit Braimllari dhe Floida Kërpaçi. Ata arrijnë t’ia heqin policisë nga duart Drobajn, ndërsa nuk mungojnë as aktet e dhunës në drejtim të efektivëve të uniformave blu, të cilët goditen nga protestuesit e tjerë. Pas disa minutash tensioni policia vendos mos ta shoqërojë 18-vjeçarin, dhe kur e lirojnë pas ndërhyrjes së deputetëve të opozitës, në tension e sipër ai sërish tenton të godasë policët.
Momenti kur deputeti i LSI, Luan Rama, ia heq nga duart policisë 18-vjeçarin
Arratia e 18-vjeçarit zgjati 24 orë. Ai u prangos pasditen e sotme në rrugën “Babë Rexha”, pranë “Pallatit me Shigjeta” në kryeqytet. Në ngarkim të 18-vjeçarit do të referohen materialet pranë Prokurorisë së Rrethit Gjyqësor Tiranë për veprat penale “Plagosje e rëndë me dashje”, “Organizimi dhe pjesëmarrja në grumbullime dhe në manifestime të paligjshme”, “Prishje e rendit dhe qetësisë publike” si dhe “Goditja për shkak të detyrës”.
Ndërkaq, mbrëmjen e kësaj të premte efektivja e policisë, Ina Nuka, la spitalin e Traumës dhe u nis për në Turqi, ku do t’i nënshtrohet një ndërhyrje kirurgjikale. Ajo u shoqërua nga një ekip mjekësor i Traumës si dhe familjarë të saj për në aeroportin e Rinasit ku e priste një avion ambulancë i posaçëm. Mjekët janë optimiste se Ina di ta kalojë me sukses operacionin dhe do jetë në gjendje të fitojë fuqinë mbi dy gishtat e dëmtuar rëndë nga kapsolla e hedhur nga 18-vjeçari Daniel Drobaj.
