Serxho Kuka, 22 vjeç dhe Eglis Delaj, i cili kishte bërë 20 vjeç, humbën jetën tragjikisht dje në një aksident të rëndë në rrugën e fshatit Omaraj në Malësi të Madhe.
“Report Tv” ka publikuar videon e aksidentit, ku duket qarte punonjësi i policisë, 51-vjeçari me iniciale V.N, i cili tenton të kthehet majtas dhe me shpejtësi të madhe vijnë të rinjtë që e godasin.
Sipas policisë, drejtuesi i automjetit “Mercedes”, pasi ka humbur kontrollin e mjetit është përplasur me kolonën e një muri rrethues. Si pasojë e kësaj përplasje ka gjetur vdekjen e menjëhershme Serxho Kuka, ndërsa Eglis Delaj ndërroi jetë teksa po transportohej për në spitalin rajonal.
Mbrëmjen e djeshme SHÇBA ka njoftuar se ka arrestuar drejtuesin e mjetit ‘Mercedes Benz’, 19-vjeçarin me iniciale M.B, dhe drejtuesin e mjetit tip ‘Audi’, 51-vjeçarin me iniciale V.N. me detyrë punonjës policie në Komisariatin e Policisë së Malësisë së Madhe.
