Në një takim me vajzat dhe djemtë e përzgjedhur për të qenë pjesë e ekuipazhit të parë shqiptar, Rama tha se këta të fundit do e përfaqësojnë më së miri Shqipërinë tek të huajt, ndërsa theksoi se linja ajrore do të ketë avionët më të mirë në rajon.
“AIR ALBANIA është projekt me rëndësi të veçantë, sepse është e para kompani ajrore e flamurit tonë dhe e para me kapital publik, brenda saj në bashkëpunim me një nga kompanitë më ekselente TURKISH AIRLINES. Një projekt që fillon me këmbë të mbarë falë jush dhe falë avionëve që do të kemi në dispozicion, që do të jenë të një modeli nga më të fundit dhe që nuk i ka askush në rajonin tonë”.
Për Kryeministrin e vendit, kompania ajrore shqiptare jo vetëm do të kontribuojë në imazhin e Shqipërisë jashtë vendit, por synohet që krahas Europës, Shqipëria të kryejë udhëtime trans-oqeanike deri në Amerikë.
“Ky projekt është një projekt që do të kontribuojë në mënyrë të rëndësishme për imazhin e vendit tonë në Europë dhe botë. Ambicia jonë është që AIR ALBANIA në një kohë të afërt të bëjë edhe fluturime trans-oqeanike”, tha Kryeministri.
Rama bëri të ditur se skuadra e AIR ALBANIA jo vetëm që është përzgjedhur falë një konkursi jo fort të lehtë, por këta të fundit do të ndjekin kursin e ekselencës së Turkish Airlines për të gjitha mësimet e nevojshme, para se të hipin në bord.
“Jam informuar që jeni këtu pas një konkursi jo të lehtë dhe me jo më pak emocione, sikundër jam informuar që ju do të ndiqni kursin e ekselencës së Turkish Airlines për të marrë të gjitha mësimet e nevojshme para se të hipni në bord. Jam i bindur që edhe me kostumet që po bëhen gati, do të jeni konkurrues me ekuipazhet më të bukur dhe më të hijshëm të botës”, – tha Rama.
Sipas tij, kjo linjë ajrore do të shërbejë edhe si mekanizëm për uljen e çmimeve të biletave.
“Është një projekt i rëndësishëm në shumë aspekte, do t’i japi shqiptarëve një pikë referimi të palëvizshme, do të rritet hap pas hapi për t’u kthyer në një tjetër mekanizëm të motorit të ekonomisë sonë, për t’i shërbyer me standardet më të larta bashkëkohore të udhëtimeve ajrore të industrisë sonë të turizmit, për të konkurruar në uljen e çmimeve ndonjëherë marramendëse për shqiptarët”, – tha Kryeministri.
Rama ndau disa detaje të rëndësishme lidhur me kompaninë e parë ajrore shqiptare. Sipas tij, ky projekt në të ardhmen do të sjellë mundësira të reja, pasi Shqipëria synon që të ketë jo vetëm udhëtime brenda Europës, por edhe udhëtime trans-oqeanike.
Rama e konsideroi historike kompaninë ajrore për aviacionin tonë duke e konsideruar një markë të re shqiptare.
“Unë quhem Joleza dhe jam pjesë e ekuipazhit dhe kompanisë së madhe ‘Air Albania’. Në emër të kolegëve dhe në emër të të gjithë shqiptarëve ju falenderojmë për këtë mundësi, për lindjen e kësaj kompanie aviacioni dhe ju premtojmë që vërtetë do të përfaqësojmë dhe do të shërbejmë me profesionalizëm. Do të përfaqësojmë kombin tonë në mënyrë dinjitoze, me dashuri dhe mikpritjen që na karakterizon ne shqiptarët. Ashtu siç është edhe një shprehje: ‘Shqiponjat janë krijuar për të fluturuar’, faleminderit që i latë të lira këto shqiponja për të përfaqësuar kombin shqiptar dhe për të prekur sa më shumë kombe dhe për t’i thënë ejani në kombin tonë”.
Lidhur me mënyrën e aplikimit, ato sqaruan se fillimisht lajmërimin e kishin parë tek faqja e Kryeministrit në rrjetin social “Facebook” ndërsa pas pranimit të aplikimit, iu nënshtruan intervistës dhe testimeve për të bërë edhe përzgjedhjen përfundimtare të tyre (test psikologjik, gjatësi, peshë, njohuri, eksperiencë pune etj). Skuadra shqiptare e ekuipazhit ajror do të nisë trajnimin intensiv në Stamboll për tri javë të plota, duke nisur nga kjo e dielë. /ma.me
