Komisioni i Pavarur i Kualifikimit ka konfirmuar në detyrë kreun e gjykatës së Apelit të Tiranës Ridvan Hado. Seancën e kaluar trupa gjykuese e përbërë nga Brunilda Bekteshi, Olsi Komici dhe Xhensila Pine e njohën gjyqtarin Hado me disa pasaktësi modeste sa i takon kriterit të pasurisë, ndërsa vlerësua pozitivisht për pastërtinë e figurës.
Gjatë vlerësimit të anës profesionale, gjyqtari i Apelit Ridvan Hadon u përball me dy gjetje të vëzhguesit ndërkombëtar Theo Jacobs në lidhje me qëndrimet e Hados në Këshillin e Lartë të Drejtësisë.
Theo Jacobs i kërkoi ‘llogari’ Ridvan Hados seancën e kaluar se pse kishte votuar pro dhënies së një leje prindërore dyvjeçare për gjyqtarin Gjin Gjoni në vitin 2018 dhe pse kishte votuar kundër kërkesës së Ministrisë së Drejtësisë për shkarkimin nga detyra të gjyqtarit Petrit Aliaj, i cili u shkarkua nga Vetingu disa ditë më parë.
Theo Jacobs e konsideroi vendimin për t’i dhënë lejen prindërore Gjin Gjonin si një akt në shkelje flagrante dhe kontribuese në cënimin e besimit të publikut tek drejtësia.
Theo Jacobs i kërkoi Komisionit të Vetingut të zbardhë rolin e Ridvan Hados, si ish-anëtar i KLD, në vendimin e KLD për të mos pranuar kërkesën e Ministrisë së Drejtësisë për të shkarkuar nga detyra gjyqtarin e Vlorës, Petrit Aliaj. Por sot KPK vendosi që ta konfirmonte në detyrë.
Ridvan Hado e ka nisur karrierën në sistemin gjyqësor në vitin 1996 dhe ka punuar për më shumë se një dekadë pranë Gjykatës së Tiranës. Në vitin 2013, Hado u emërua gjyqtar i Gjykatës së Apelit Tiranë, detyrë të cilën e kryen edhe aktualisht.
Në vitin 2016, Hado u zgjodh anëtar i Këshillit të Lartë të Drejtësisë, ndërkohë që paralelisht me karrierën e tij si gjyqtar është angazhuar edhe në mësimdhënie.
g.kosovari
