Pushtimi i Ukrainës nuk prek qytetarët rusë vetëm ekonomikisht për shkak të sanksioneve të aplikuara ndaj vendit të tyre, por edhe kur zgjedhin një destinacion pushimi. Konkretisht, janë zyrtarët e shtetit ata që e kanë më shumë problem se ku do të kalojnë ditët e pushimit.
Media të ndryshme ruse, si “The Moscow Times”, theksuan se këta punonjës të sektorit publik janë të kufizuar në zgjedhjen e vendit ku duan të udhëtojnë. Pavarësisht se shumica prej tyre kanë zgjedhur destinacione të ndryshme në Evropë, ata po përballen me probleme për shkak të sanksioneve të aplikuara ndaj Rusisë, arsye kjo që kufizon udhëtimet e huaja në shtetet e ish-Bashkimit Sovjetik apo turizmin në nivel kombëtar.
Dëshmi të ndryshme të zyrtarëve shpjegojnë situatën e tyre aktuale.
“Vetëm të çmendurit do të shkonin jashtë tani. Do t’ju përzënë dhe do të ishit me fat nëse nuk përfundoni në gjykatë”, tha një senator për “Vyorstka”. Ky medium thekson se, në vend të destinacioneve tradicionale evropiane, alternativat kalojnë përmes vendeve si Turqia, Uzbekistani, Bjellorusia, Kazakistani, Azerbajxhani, Arabia Saudite dhe Moldavia.
Bashkimi Evropian, Mbretëria e Bashkuar, Shtetet e Bashkuara dhe Kanadaja vendosën së bashku të përjashtojnë një gamë të gjerë bankash ruse nga sistemi financiar SWIFT. Gjithashtu, kjo bllokadë dëmton institucionet financiare të vendit, pasi ato do të mbeten jashtë të gjitha transaksioneve financiare dhe lëvizjeve të pagesave në mbarë botën. Ngrirja e aseteve të Bankës Qendrore Ruse në Bashkimin Evropian, Mbretërinë e Bashkuar, Shtetet e Bashkuara dhe Kanada, ka çuar në ndalimin e të gjitha llojeve të transaksioneve globale me rezervën kryesore ekonomike të vendit. Gjithashtu, një tjetër nga masat që është marrë së bashku është mbyllja e hapësirës ajrore për të gjitha linjat ajrore nga Rusia.
Ukraina dhe sanksionet ndaj zyrtarëve për pushime
Qeveria ukrainase, për shembull, i ka ndaluar zyrtarët e saj të shkojnë me pushime ndërkohë që pushtimi rus vazhdon. Ata mund të dalin vetëm “brenda kuadrit të një misioni”. Ndalimi shtrihet edhe për zyrtarët e lartë, deputetët dhe përfaqësuesit politikë lokalë, sipas dokumentit të publikuar në faqen zyrtare të qeverisë.
Në fakt, këtë janar, presidenti ukrainas, Volodymyr Zelensky, shkarkoi nëntë zyrtarë të lartë të akuzuar se kishin shkuar me pushime në Spanjë dhe Francë, përveç se u akuzuan për marrje ryshfeti në mes të pushtimit rus. Nga ata nëntë, katër zëvendësministra dhe pesë guvernatorët rajonalë të Ukrainës u shkarkuan nga detyrat e tyre.
/a.r
