Vetëm koha do ta tregojë se për sa kohë Shtetet e Bashkuara do të mbikëqyrin Venezuelën, ka deklaruar presidenti amerikan Donald Trump në një intervistë për New York Times. I pyetur nëse bëhet fjalë për disa muaj apo më shumë se një vit, Trump u shpreh se periudha do të jetë “shumë më e gjatë”.
“Do ta rindërtojmë Venezuelën në një mënyrë shumë fitimprurëse. Do të përdorim naftën, do ta marrim naftën, po ulim çmimet dhe do t’i japim para vendit, para për të cilat ka nevojë dëshpërimisht”, tha ai.
Gazetarët e New York Times ishin dëshmitarë të një telefonate mes Trump dhe presidentit të Kolumbisë, Gustavo Petro. Vetëm disa ditë më parë, Trump e kishte kërcënuar Kolumbinë me veprime ushtarake, por tani duket se qëndrimi është zbutur. Presidenti amerikan e ka ftuar Petron në Uashington.
“Folëm për trafikun e drogës dhe dallimet tona të mendimit. E vlerësova tonin dhe pres ta takoj”, tha Trump. Petro e cilësoi bisedën si “kordiale” dhe më pas e ftoi Rodríguez-in në Bogota.
Presidenti kolumbian deklaroi se synon të nisë një «dialog trepalësh dhe, nëse është e mundur, global» për stabilizimin e Venezuelës. Ndërkohë, Jorge Rodríguez, kreu i Asamblesë Kombëtare venezueliane, njoftoi se do të lirohen të burgosurit politikë.
Administrata amerikane këmbëngul se kontrolli i shitjeve dhe i të ardhurave nga nafta venezueliane është i domosdoshëm për rindërtimin e ekonomisë së vendit. Sot, Trump pritet të takohet me drejtuesit e kompanive Exxon Mobil, ConocoPhillips dhe Chevron.
Në Kongres, pesë senatorë republikanë votuan së bashku me demokratët për një rezolutë që synon të kufizojë veprimet ushtarake të Trump në Venezuelë pa miratimin e Kongresit. Presidenti reagoi ashpër, duke i quajtur senatorët “tradhtarë”, ndërsa zëvendëspresidenti JD Vance deklaroi se rezoluta «nuk do të ndryshojë asgjë në politikën e jashtme amerikane».
I pyetur nëse sheh kufij për pushtetin e tij global, Trump u përgjigj: Vetëm moraliteti dhe mendja ime. Nuk kam nevojë për të drejtën ndërkombëtare.
