Verifikimi i njerëzve të drejtësisë, ONM: Kemi akses në të gjitha institucionet për informacione

Operacioni Ndërkombëtar i Monitorimit ka akses në të gjitha institucionet për informacione rreth njerëzve të drejtësisë që do të verifikojë.

ONM për figurat që do të kalojë në filtër, që do të bëjnë drejtësinë e re në Shqipëri i është përgjigjur interesit të Report Tv për mënyrën e funksionimit dhe marrjes së informacionit.

ONM është pyetur për aksesin në institucionet shqiptare dhe informacionet jashtë vendit, për shembull paratë e transferuara në bankat e huaja, biznese që gjyqtarë e prokurorë mund të kenë jashtë.

“Shtojca e Kushtetutës së Shqipërisë, neni 3 B paragrafi ç parashtron se vëzhguesit ndërkombëtarë të vendosur në kuadër të ONM do të kenë akses të menjëhershëm në të gjitha informacionet, njerëzit dhe dokumentet e nevojshme që duhen monitoruar dhe rivlerësuar.

Një akses i tillë do të garantohet në të gjitha nivelet dhe fazat. Pra, Vëzhguesit ndërkombëtarë kanë akses në informacionet e dhëna nga institucionet në Shqipëri në kohën kur kërkesat janë dorëzuar për institucionet shqiptare në mënyrë që të marrin informacionin e duhur në kuadër të bashkëpunimit ndërkombëtar” përgjigjet Operacioni Ndërkombëtar i Monitorimit në Tiranë.